بھارت کو مشرقی محاذ پر ہرایا ہے اب مغربی محاذ پر بھی ہرائیں گے

مغربی سرحدوں پر بھارتی پراکسیز سرگرم ہیں، کالعدم ٹی ٹی پی اور بی ایل اے بھارت کی ایجنٹ ہیں، دہشتگردوں کا وہی حال کریں گے جو بھارتی فضائیہ کا کیا ہے۔وزیردفاع خواجہ آصف

ثنااللہ ناگرہ ہفتہ 17 مئی 2025 23:29

بھارت کو مشرقی محاذ پر ہرایا ہے اب مغربی محاذ پر بھی ہرائیں گے

اسلام آباد ( اردوپوائنٹ اخبار تازہ ترین۔ آئی پی اے ۔ 17 مئی 2025ء ) وزیردفاع خواجہ آصف نے کہا ہے کہ بھارت کو مشرقی محاذ پر ہرایا ہے اب مغربی محاذ پر بھی ہرائیں گے، کالعدم ٹی ٹی پی اور بی ایل اے بھارت کی ایجنٹ ہیں، دہشتگردوں کا وہی حال کریں گے جو بھارتی فضائیہ کا کیا ہے۔انہوں نے میڈیا سے گفتگو کرتے ہوئے کہا کہ اللہ تعالیٰ نے معرکہ حق کی بدولت پاکستان کو جو فتح دی ہے اس کی تاریخ میں مثال نہیں ملتی، معرکہ حق قومی اتحاد کا باعث بنا۔

دشمن بھارت کو تاریخی شکست دی ہے، ایسے تو پتنگ بھی نہیں کٹتی جیسے بھارتی طیارے کٹے، اب ہماری جنگ دہشتگردوں کے خلاف ہے، بھارت جلد مغربی سرحد پر بھی زخم چاٹے گا، بھارت کو مشرقی محاذ پر ہرایا ہے اب مغربی محاذ پر بھی ہرائیں گے، مغربی سرحدوں پر بھارت کی پراکسیز سرگرم ہیں، کالعدم ٹی ٹی پی اور بی ایل اے بھارت کی ایجنٹ ہیں، دہشتگردوں کا وہی حال کریں گے جو بھارتی فضائیہ کا کیا ہے۔

(جاری ہے)

اب مودی کو ہمیں کچھ کہنے کی ضرورت نہیں، بھارت میں ہی مودی کو بہت کچھ کہا جارہا ہے وہ تو ہم بھی نہیں کہہ سکتے۔ مزید برآں نائب وزیراعظم اور وزیرخارجہ اسحاق ڈار نے نجی ٹی وی سے گفتگو کرتے ہوئے کہا کہ پاکستان اور بھارت دونوں ممالک میں کشیدگی میں کمی کیلئے کام ہورہا ہے، ہم بھارت کے ساتھ مذاکرات کیلئے تیار ہیں، امریکی وزیرخارجہ نے کال کی اور کہا کہ بھارت سیز فائر کیلئے تیار ہے، ہم نے جواب دیا کہ اگر بھارت نے دوبارہ حملہ کیا تو ہمیں جواب دینے کا پورا حق ہے۔

سیزفائر کے بعد پورے پارلیمنٹ کو اعتماد میں لیا، قرارداد میں کھلے دل کے ساتھ اپوزیشن کی تجاویز کو شامل کیا، ایک ہی قرارداد پر ہمارے اور اپوزیشن کے دستخط موجود ہیں۔ اسحاق ڈار نے کہا کہ پاکستان کا بیانیہ دنیا میں اجاگر کرنے کیلئے پورا پلان 48گھنٹوں میں تیار ہوچکا ہے، پارلیمنٹرین کا ایک وفود امریکا، دوسرا برطانیہ، برسلزاور فرانس جائے گا، جبکہ ایک وفد روس بھی جائے گا۔

انہوں نے کہا کہ مناسب نہیں کہ پانی ایشو سے متعلق پلان میڈیا پر سامنے لاؤں۔ ہم ہر چیز کو دیکھ رہے ہیں، ڈیمز اور آبی ذخائر راتوں رات نہیں بنتے۔ ہم سندھ طاس معاہدے سے متعلق بھارت کو بھرپور جواب دے چکے ہیں، ہم نے ان کے 24اپریل کے خط کا جواب دے دیا تھا کہ آپ ایسا نہیں کرسکتے۔بھارت نے چار میزائل فائر کئے جن میں تین امرتسر میں گرگئے، بھارت کا ایک میزائل پاکستانی حدود میں آیا جس کو کامیابی سے گرا دیا گیا۔