Live Updates

پاک بھارت کشیدگی؛ وزیرخارجہ کی قیادت میں مشاورتی وفد چین بھیجنے کا فیصلہ

وفد میں مختلف حکومتی حکام شامل ہوں گے جو علاقائی امن و استحکام کے حوالے سے بات چیت کریں گے

ساجد علی اتوار 18 مئی 2025 12:15

پاک بھارت کشیدگی؛ وزیرخارجہ کی قیادت میں مشاورتی وفد چین بھیجنے کا ..

اسلام آباد ( اُردو پوائنٹ اخبارتازہ ترین۔ 18 مئی2025ء ) حکومت نے پاکستان اور بھارت کے درمیان جاری کشیدہ صورتحال کے باعث وزیرخارجہ اسحاق ڈار کی قیادت میں مشاورتی وفد چین بھیجنے کا فیصلہ کرلیا۔ میڈیا رپورٹس کے مطابق پاکستان اور بھارت کے درمیان کشیدگی کے پیش نظر نائب وزیراعظم اسحاق ڈار کی قیادت میں پاکستان کا اہم وفد کل چین کا دورہ کرے گا، ذرائع کا کہنا ہے کہ اس دورے کا مقصد خطے کی موجودہ کشیدہ صورتحال پر چینی قیادت کے ساتھ مشاورت کرنا ہے، وفد میں مختلف حکومتی حکام شامل ہوں گے جو علاقائی امن و استحکام کے حوالے سے بات چیت کریں گے، دورے کے دوران افغان وزیر خارجہ بھی چین میں موجود ہوں گے جو منگل کے روز چین میں قیام کریں گے، جس کے باعث یہ دوراہ اور اس دوران ہونے والی ملاقاتیں علاقائی سیاسی صورتحال اور باہمی تعاون کو مضبوط بنانے میں اہم کردار ادا کریں گی۔

(جاری ہے)

بتایا جارہا ہے کہ وزیرِ اعظم محمد شہباز شریف نے بھارتی پراپیگنڈے اور مذموم سازشوں کو عالمی سطح پر بے نقاب کرنے کیلئے سفارتی وفد بیرون ممالک بھیجنے کا فیصلہ کیا ہے، اس سلسلے میں وزیرِ اعظم نے چیئرمین پاکستان پیپلز پارٹی بلاول بھٹو زرداری کو ٹیلی فون کیا، اس موقع پر وزیراعظم محمد شہباز شریف نے بھارتی پراپیگنڈے کو بے نقاب کرنے کیلئے تشکیل کردہ وفد کی قیادت چیئرمین بلاول بھٹو زرداری کو سونپ دی۔

معلوم ہوا ہے کہ ڈاکٹر مصدق ملک، انجنیئرخرم دستگیر، سینیٹر شیری رحمان، حنا ربانی کھر، فیصل سبزواری، تہمینہ جنجوعہ اور جلیل عباس جیلانی وفد میں شامل ہوں گے، یہ وفد لندن، واشنگٹن، پیرس اور برسلز میں خطے میں بھارت کے پراپیگنڈے اور خطے کے امن کو تباہ کرنے کی کوششوں کو بے نقاب کرے گا، وفد پاکستان کی خطے میں امن قائم رکھنے کیلئے کوششوں کو اجاگر کرے گا۔