Live Updates

،پاکستان چین، افغانستان اور ایران کے راستے سینٹرل ایشیا، یورپ اور روس تک 6 تجارتی راہداریوں کے ذریعے تجارت کو فروغ دے گا

Cبلوچستان اور خیبر پختون خواہ میں دہشتگردی پر قابو پا کر تمام اقتصادی راہداریوں کو تیز رفتاری سے فعال بنایا جا سکتا ہے، چیئرمین قائمہ کمیٹی سینیٹر محمد عبدالقادر

اتوار 18 مئی 2025 20:30

Oکوئٹہ (اُردو پوائنٹ اخبارتازہ ترین - آن لائن۔ 18 مئی2025ء) چیئرمین قائمہ کمیٹی برائے دفاعی پیداوار سینیٹر محمد عبدالقادر نے کہا ہے کہ پاکستان چین، افغانستان اور ایران کے راستے سینٹرل ایشیا، یورپ اور روس تک 6 ممکنہ تجارتی راہداریو ں کے ذریعے تجارت کو فروغ دے گا ان راہداریوں میں کراچی سے ماسکو بذریعہ چین اور قازقستان، گوادر سے افغانستان کے ذریعے ماسکو اور ترکمانستان اور ایران سے آذربائیجان اور روس تک کے روڈ نیٹ ورک شامل ہیں مزار شریف سے کوہاٹ ریل کے منصوبے پر 633 ملین ڈالر کی خطیر لاگت آئے گی پاکستان ساتھ ایشیا اور سینٹرل ایشیا کے مابین ٹرانزٹ پوائنٹ نہیں بلکہ اکنامک برج کے طور پر کام کرنے کا خواہاں ہے اسی لئے گزشتہ برسوں میں ہونے والے متعدد معاہدوں سمیت شنگھائی تعاون تنظیم میں پاکستان فعال انداز میں کام کر رہا ہے۔

(جاری ہے)

یہاں جاری ہونے والے ایک بیان میں چیئرمین قائمہ کمیٹی برائے دفاعی پیداوارمحمد عبدالقادر نے کہا ہ پاکستان ان راہداریوں کے ذریعے ملکی تجارتی سرگرمیوں کو فروغ دیتے ہوئے اربوں ڈالر کا زرمبادلہ کما سکتا ہے ان راہداریوں کے ثمرات سب سے پہلے بلوچستان اور خیبر پختون خواہ کو ملیں گی. دونوں صوبوں سے بے روزگاری میں تیزی سے کمی واقع ہوگی علاقائی خوشحالی کے باعث سماجی مسائل اور جرائم میں کمی ہو گی بلوچستان اور خیبر پختون خواہ میں دہشتگردی پر قابو پا کر ملکی ترقی و خوشحالی کے خواب کو شرمندہ تعبیر کیا جا سکتا ہے بھارت اور افغانستان کی شہہ سے بلوچستان اور خیبر پختون خواہ میں ہونے والی دہشتگردی پاکستان کے اقتصادی ترقی کے خواب کی تعبیر کے راستے میں حائل ہو سکتی ہے بلوچستان اور خیبر پختون خواہ میں دہشتگردی پر قابو پا کر تمام اقتصادی راہداریوں کو تیز رفتاری سے فعال بنایا جا سکتا ہے۔