لبریشن فرنٹ کا بھارت اور پاکستان کے درمیان جنگ بندی کرانے پرامریکی صدر ڈونلڈ ٹرمپ کی تعریف،تنازعہ کشمیر کے پرامن حل کی حمایت کا مطالبہ

بدھ 21 مئی 2025 22:20

اسلام آباد (اُردو پوائنٹ اخبارتازہ ترین - اے پی پی۔ 21 مئی2025ء) جموں و کشمیر لبریشن فرنٹ نے بھارت اور پاکستان کے درمیان جنگ بندی کرانے پر امریکی صدر ڈونلڈ ٹرمپ کی تعریف کی ہے۔ کشمیر میڈیا سروس کے مطابق لبریشن فرنٹ کے ممبر سپریم کونسل محمد حلیم خان نے صدر ٹرمپ کے نام خط میں دونوں ہمسایہ جوہری طاقتوں کے درمیان جنگ بندی اور خطے میں تباہی رکوانے پر مداخلت پر شکریہ ادا کیا اور امریکی صدر پر زور دیا کہ وہ تنازعہ کشمیر کے پرامن حل کی حمایت کریں۔

خط میں کہا گیا ہے کہ کشمیر ایک دیرینہ مسئلہ ہے اورکشمیری اس تنازعے کے بنیادی فریق ہیں اور مسئلہ کشمیر کے حل سے متعلق کسی بھی مذاکراتی عمل میں انکی شمولیت ناگزیر ہے ۔ حلیم خان نے مستقبل میں تنازعات کو روکنے اور کشمیری عوام کی فلاح و بہبود کو یقینی بنانے کے لیے اس مسئلے کے فوری پرامن حل پر زور دیا۔

(جاری ہے)

خط میں کئی دہائیوں کی مزاحمت، مسلح جدوجہد، انسانی حقوق کی خلاف ورزیوں اور بڑی تعداد میں قابض فوجیوں کی تعیناتی کا حوالہ دیتے ہوئے تنازعہ کشمیر کی پیچیدہ نوعیت کواجاگرکیا گیا ہے۔

اقوام متحدہ کی متعددقراردادوں کے باوجود بشمول 13 اگست 1948 کی قراردادجس میں جموں وکشمیر کے مستقبل کے تعین کے لیے ریفرنڈم کا مطالبہ کیاگیاہے تنازعہ کشمیر کو حل نہیں کیاجاسکاہے۔خط میں امریکہ پر زور دیا گیا ہے کہ وہ خطے میں اقوام متحدہ کے امن مشن کی تعیناتی کی حمایت کرے اور آزادانہ اور منصفانہ رائے شماری میں سہولت فراہم کرے تاکہ کشمیری عوام اپنے مستقبل کا فیصلہ خود کر سکیں۔

خط میں امریکی صدر ٹرمپ کی قیادت پر یقین کا اظہار کرتے ہوئے کہاگیاہے کہ یقینا وہ تنازعہ کشمیر کے باوقار حل میں مدد کر سکتے ہیں ۔حل طلب تنازعہ کشمیر کی وجہ سے گزشتہ سات دہائیوں سے کشمیریوں کو شدیدمشکلات کا سامنا ہے ۔ انہوں نے صدر ٹرمپ پرکنٹرول لائن پر جنگ بندی کو مزید فعال بنانے ، مقبوضہ کشمیرمیں انسانی حقوق کی پامالیاں بند کرانے ، یاسین ملک سمیت آزادی پسند سیاسی رہنمائوں کی بھارتی جیلوں سے رہائی ، کشمیریوں کو انکے بنیادی حقوق کی فراہمی پرزوردیاگیاہے۔