پی ایس ایل ، لاہور قلندرز نے اسلام آباد یونائیٹڈ کو شکست دے کر فائنل میں جگہ بنا لی

لاہور (اُردو پوائنٹ اخبارتازہ ترین - اے پی پی۔ 24 مئی2025ء) پاکستان سپرلیگ 10 کے دوسرے کوالیفائر میچ میں لاہور قلندرز نے اسلام آباد یونائیٹڈ کو 95 رنز کے بڑے مارجن سے شکست دے کر فائنل میں جگہ بنالی۔اسلام آباد یونائیٹڈ کی ٹیم 203 رنز کے ہدف کے تعاقب میں صرف 107 رنز پر آوٹ ہوگئی، کوئی بھی کھلاڑی جم کر بیٹنگ نہ کرسکا، دو کھلاڑی سلمان آغا ( 33 رنز ) اور کپتان شاداب خان ( 26 ) ڈبل فگرز میں داخل ہوسکے۔

اسلام آباد یونائیٹڈ کی ٹیم لاہور قلندرز کے بولرز کی بہترین بولنگ اور اہم ترین میچ میں ایک بڑے ہدف کے تعاقب کا دبا وبرداشت نہ کرسکی اور ان کی وکٹیں تیزی سے گرتی چلی گئیں۔ ٹورنامنٹ میں بہترین بلے بازی کا مظاہرہ کرنے والے صاحبزادہ فرحان محض تین رنز بناسکے، دوسرے اوپنر محمد شہزاد صفر پر آوٹ ہوگئے۔

(جاری ہے)

راسی وینڈر ڈسین نے سات ،عماد وسیم نے آٹھ جبکہ جیمز نیشم آٹھ اور حیدر علی چار رنز بنا کر آوٹ ہوئے، نسیم شاہ صفر پر آوٹ ہوئے جبکہ ٹائی ملز نے سات رنز بنائے۔

لاہور قلندرز کی جانب سے کپتان شاہین شاہ آفریدی، سلمان مرزا اور ارشاد حسین نے تین، تین کھلاڑیوں کو آوٹ کیا۔قبل ازیں لاہور قلندرز نے ٹاس جیت کر اسلام آباد یونائیٹڈ کے خلاف پہلے بیٹنگ کا فیصلہ کیا۔ لاہور قلندرز کوآغاز ہی میں نقصان اٹھانا پڑا، جب سٹار بیٹر فخر زمان دوسرے اوور کی آخری گیند پر آوٹ ہوگئے۔انہوں نے 11 گیندوں پر 12 رنز بنائے۔

دوسرے اینڈ سے محمد نعیم نے تیزی سے رنز سکور کرنا شروع کیے اور سات چوکوں اور دو چھکوں کی مدد سے محض 24 گیندوں پر دھواں دار نصف سنچری مکمل کرنے کے بعد اگلی ہی گیند پر انہیں عماد وسیم نے آوٹ کردیا۔عبداللہ شفیق نے 3 چوکوں کی مدد سے 25 رنز بنائے، انہیں جیمز نیشم نے آوٹ کیا، کوشل پریرا نے 35 گیندوں پر 61 رنز کی دھواں دار اننگز کھیلی، ان کی اننگز میں سات چوکے اور دو چھکے شامل تھے۔

بھانوکا راجا پکسا 22 اور آصف علی 15 رنز بناکر پویلین لوٹے، جبکہ شکیب الحسن کھاتہ کھولے بغیر آوٹ ہوگئے۔اسلام آباد یونائیٹڈ کی جانب سے ٹائمل ملز نے تین، سلمان ارشاد نے دو جبکہ عماد وسیم اور جیمز نیشم نے ایک ایک وکٹ حاصل کی۔پاکستان سپر لیگ کے دسویں ایڈیشن کا فائنل 25 مئی بروز اتوار کوئٹہ گلیڈی ایٹرز اور لاہور قلندرز کے درمیان لاہور میں کھیلا جائے گا۔