پاک افواج نے بھارتی فسطائیت کا جوانمردی کیساتھ جواب دے کر قوم کا سر فخر سے بلند کردیا، بیرسٹرسلطان

اسلام آباد (اُردو پوائنٹ اخبارتازہ ترین - این این آئی۔ 24 مئی2025ء)صدر آزاد جموں وکشمیربیرسٹر سلطان محمود چوہدری نے کہا ہے کہ بھارت نے جنگی جارحیت کر تے ہوئے پاکستان کی سرحدوں کی خلاف ورزی کی اور حملہ آور ہوا۔ ہماری پاک افواج نے بھارت کی اس جارحیت کا منہ توڑ جواب دیا اور اُس کے جنگی جنون کو خاک میں ملایا۔ ہم پاک افواج کی اس کامیابی پر انہیں خراج تحسین پیش کرتے ہیں ہماری پاک افواج نے بھارت کی فسطائیت کا جوانمردی کے ساتھ جواب دیا اور پوری قوم کا سر فخر سے بلند کیا۔

بھارت ایک ڈر پوک دشمن ہے جس نے رات کی تاریکی میں پاکستان پر حملہ کیا اور معصوم لوگوں کو رات کی تاریکی میں شہید کیا۔ ہندوستان پاک افواج کی طرف سے جوابی کارروائی سے بوکھلاہٹ کا شکار ہو گیا اور اُس نے لائن آف کنٹرول پر شہری آبادیوں کو بمباری کا نشانہ بنایا جس کے نتیجے میں شہریوں کی املاک کو نقصان پہنچا اور معصوم لوگ شہید ہوئے۔

(جاری ہے)

پاک فوج اور پاک فضائیہ کی طرف سے جوابی کارروائی میں بھارت کو بری طرح شکست کا سامنا کرنا پڑا اور مودی سرکار کو اس وقت اپنے ملک کے اندر ہزیمت کا سامنا ہے۔

بھارت کی اس شکست پر بھارتی عوام نریندر مودی سے استعفیٰ کا مطالبہ کر رہی ہے۔ ان خیالات کا اظہار صدر آزاد جموں وکشمیر بیرسٹر سلطان محمود چوہدری نے آج یہاں ایوان صدر کشمیر ہائوس اسلام آباد میں چیئرمین ضلع کونسل میرپور راجہ نوید اختر گوگا، پولیٹیکل سیکرٹری ہمراہ صدر گرامی سکندر بیگ اور صدارتی کوارڈینیٹر چوہدری امجد محمود آرائیں سے ایک تفصیلی ملاقات میں کیا۔

اس موقع پر صدر آزاد جموں وکشمیر بیرسٹر سلطان محمود چوہدری نے کہا کہ بھارت اب دفاعی پوزیشن پر آ چکا ہے اور ہم سب کو مل تمام سیاسی وابستگیوں سے بالا تر ہو کر مسئلہ کشمیر کے حل اور بھارتی جارحیت کو دنیا کے سامنے بے نقاب کرنے کے لئے اپنا کردار ادا کرنا ہو گا۔ امریکی صدر ڈونلڈ ٹرمپ کی طرف سے مسئلہ کشمیر پر ثالثی کی پیشکش ایک خوش آئند قدم ہے جس کا ہم خیر مقدم کرتے ہیں اور امریکی صدر کی طرف ثالثی کی پیشکش کی وجہ سے مسئلہ کشمیر بین الاقوامی سطح پر ایک بار پھر اُجاگر ہوا ہے اور انٹرنیشنل کمیونٹی کی توجہ مسئلہ کشمیر پر مرکوز ہوئی ہے اس لئے ہم سب کو مل کر بالخصوص اوورسیز کشمیریوں کو مسئلہ کشمیر کے حل اور بھارتی جنگی جارحیت کو بے نقاب کرنے کے لئے کمر بستہ ہونا پڑے گا تاکہ مودی کے ان مکروہ عزائم کو دنیا کے سامنے بے نقاب کیا جا سکے۔

صدر آزاد جموں وکشمیر بیرسٹر سلطان محمود چوہدری نے مزید کہا کہ میرپور کے عوام کے مسائل کا حل اور تعمیر و ترقی میری اولین ترجیحات میں شامل ہیں اور مجھے یہ اعزاز حاصل ہے کہ میرپور کے عوام نے مجھی9مرتبہ آزاد جموں وکشمیر قانون سا ز اسمبلی کا ممبر منتخب کیا یہ اعزاز آج تک کسی کے پاس نہیں ہے۔ صدر آزاد جموں وکشمیر بیرسٹر سلطان محمود چوہدری نے کہا کہ میرپور کے عوام کے جتنے مسائل ہیں وہ جلد حل کیے جائیں گے اور اس حوالے سے میں خود اپنی نگرانی میں میرپور کے عوام کے مسائل ترجیحی بنیادوں پر حل کرائوں گا اور اس سلسلے میں کوئی دقیقہ فروگزاشت نہیں رکھی جائے گی۔