متعدد موٹرویز کو ہنگامی طور پر بند کر دیا گیا

پنجاب میں غیر معمولی اور خطرناک موسمی صورتحال کے باعث موٹروے پولیس نے قومی شاہراہوں کو عام ٹریفک کیلئے بند کر دیا

محمد علی ہفتہ 24 مئی 2025 19:37

لاہور (اُردو پوائنٹ اخبارتازہ ترین۔ 24 مئی2025ء) متعدد موٹرویز کو ہنگامی طور پر بند کر دیا گیا، پنجاب میں غیر معمولی اور خطرناک موسمی صورتحال کے باعث موٹروے پولیس نے قومی شاہراہوں کو عام ٹریفک کیلئے بند کر دیا۔

تفصیلات کے مطابق ہفتے کے روز موٹروے پولیس نے شدید گردو غبار کے باعث پنجاب بھر میں متعدد موٹر ویز بند کرنے کر دیں۔

میڈیا رپورٹس کے مطابق ہفتے کے روز موٹروے ایم تھری کو فیض پور سے درخانہ تک جبکہ ایم ٹو کو ٹھوکر نیاز بیگ سے کوٹ مومن تک بند کیا گیا۔ طوفانی حالات کی وجہ سے سیالکوٹ موٹروے بھی بند ہو گئی ہے۔ موٹروے پولیس کے ترجمان کے مطابق یہ اقدامات خطرناک موسمی حالات میں مسافروں کی حفاظت کو یقینی بنانے کے لیے کیے گئے ہیں۔

(جاری ہے)

واضح رہے کہ ہفتے کے روز لاہور سمیت پنجاب میں بارش نے تباہی مچا دی،9افراد جاں بحق، درجنوں زخمی ہو گئے۔

ذرائع کے مطابق صوبائی دارالحکومت کے مختلف علاقوں اپرمال میں 2، لکشمی چوک، مغلپورہ، تاجپورہ اور چوک ناخدا میں 1 ملی میٹر بارش ریکارڈ ہوگئی جبکہ سہ پہر 5:08 سے شروع ہونے والی بارش اوسطا 0.4 ملی میٹر ریکارڈ کی گئی۔ اسی طرح جیل روڈ، ایئر پورٹ ،گلبرگ اور نشتر ٹاؤن میں ہلکی بارش جبکہ پانی والا تالاب ،فرخ آباد، گلشن راوی، اقبال ٹاؤن ،سمن آباد اور جوہر ٹاﺅن میں شدید بارش سے بجلی کا نظام متاثر ہوا، تیز آندھی اور بارش کے باعث این ٹی ڈی سی 220 کے وی بند روڈ، غازی اور کوٹ لکھپت سمیت لیسکو کے 60 سے زائد گرڈ سٹیشن ٹرپ کرنے سے بیشتر علاقوں میں بجلی بند رہی۔

قبل ازیں آندھی کے باعث چڑیاگھر کی پارکنگ میں درخت گرگیا تاہم کوئی جانی نقصان نہیں ہوا، موسم کی خرابی اور آندھی کے بعد میٹرو اورنج لائن ٹرین بند اور سٹیشنز خالی کروا لیے گئے۔ اسی طرح رائیونڈ روڈ بھوبتیاں چوک کے قریب تیز آندھی کے باعث دیوار گر نے سے دو افراد زخمی ہوئے، زخمیوں میں 25 سالہ عثمان اور 20 سالہ حسنین شامل ہیں جنہیں مقامی ہسپتال منتقل کر دیا گیا۔