وزیراعظم کی ترک صدر سے ملاقات، دوطرفہ تعلقات مزید مستحکم کرنے پر اتفاق

استنبول ( اُردو پوائنٹ اخبارتازہ ترین۔ 25 مئی 2025ء ) وزیراعظم شہباز شریف کی ترکیہ کے صدر طیب اردوان سے ملاقات ہوئی ہے جس میں دونوں رہنماؤں نے دوطرفہ تعلقات مزید مستحکم کرنے پر اتفاق کیا۔ ترک میڈیا کے مطابق وزیراعظم شہباز شریف استنبول میں ترک صدارتی محل پہنچے جہاں ان کی ترکیہ کے صدر طیب اردوان سے ملاقات ہوئی، اس موقع پر دونوں ممالک کے درمیان تعلقات پر تبادلہ خیال کیا گیا، شہباز شریف اور طیب اردوان نے علاقائی امن اور کے لیے دہشت گردی کے خلاف مشترکہ تعاون پر زوردیا، جنگ کے دوران ترکیہ نے پاکستان کی کھل کر حمایت کی اس پر وزیر اعظم شہباز شریف نے ترک صدر کا شکریہ ادا کیا، دونوں ممالک کے رہنماؤں کی وفد کی سطح پر بھی ملاقات ہوئی، فیلڈ مارشل عاصم منیر بھی ملاقات میں شریک ہوئے۔

(جاری ہے)

بتایا گیا ہے کہ بھارتی کشیدگی کے دوران حمایت پر اظہار تشکر کے لیے وزیر اعظم شہبازشریف 4 ملکی دورے کے پہلے مرحلے میں ترکیہ کے 2 روزہ دورے پر استنبول پہنچے ہیں جہاں وہ ترک صدر رجب طیب اردوان سمیت مختلف وفود سے بھی ملاقات کریں گے، دورے میں پاک ترکیہ کے درمیان دفاع سمیت مختلف شعبوں میں تعاون کو مزید وسعت دینے پر بھی بات چیت ہوگی، ترکیہ اور پاکستان کے درمیان دفاع، معیشت، سیاحت اور ثقافت سمیت مختلف شعبوں میں تعاون کو مزید وسعت دینے پر بھی بات چیت کی جائے گی۔

معلوم ہوا ہے کہ استنبول کے ہوائی اڈے پہنچنے پروزیراعظم شہبازشریف کا ترک وزیر دفاع یشار گلر، گورنراستنبول، پاکستان ترکیہ کلچرل ایسوسی ایشن کے صدر برہان قایاترک، پاکستانی سفیر یوسف جنید، کونسل جنرل استنبول نعمان اسلم، حکومت ترکیہ کے اعلی حکام اور ترکیہ میں تعینات پاکستانی سفارتکاروں نے وزیراعظم اور وفد کا استقبال کیا، وزیر اعظم کے دورے کا مقصد ترکیہ کے عوام اور بالخصوص صدر ایردوان کا شکریہ ادا کرنا ہے، ترکیہ نے ہمیشہ کی طرح حالیہ پاک بھارت کشیدگی میں بھی پاکستان کی اصولی مؤقف کی بھر پور حمایت کی۔

بتایا جارہا ہے کہ وزیر اعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی ہیں، وزیر اعظم پاکستان محمد شہباز شریف 25 سے 30 مئی 2025 تک ترکی، ایران، آذربائیجان اور تاجکستان کا دورہ کریں گے، وزیر اعظم ان ممالک کے رہنماؤں کے ساتھ دو طرفہ تعلقات اور علاقائی اور بین الاقوامی اہمیت کے معاملات پر وسیع پیمانے پر بات چیت کریں گے اور بھارت کے ساتھ حالیہ بحران کے دوران دوست ممالک کی جانب سے پاکستان کو دی گئی حمایت پر ان کا شکریہ ادا کریں گے۔