پاکستان بحریہ کے سربراہ ایڈمرل نوید اشرف نے بھی قذافی اسٹیڈیم میں پی ایس ایل کا فائنل میچ دیکھا

چیئرمین پی سی بی نے آمد پر خیر مقدم کیا ،امریکہ کی قائمقام سفیر ، وفاقی وزیر خزانہ ،سیاسی اکابرین ،اعلی سول و عسکری حکام بھی موجود تھے

اتوار 25 مئی 2025 22:40

لاہور(اُردو پوائنٹ اخبارتازہ ترین - این این آئی۔ 25 مئی2025ء)پاکستان بحریہ کے سربراہ ایڈمرل نوید اشرف نے بھی قذافی اسٹیڈیم میں لاہور قلندرز اور کوئٹہ گلیڈی ایٹرز کے درمیان کھیلا جانے والا پاکستان سپر لیگ کا فائنل میچ دیکھا ۔اسٹیڈیم آمد پر چیئرمین پی سی بی محسن نقوی نے نیول چیف ایڈمرل نوید اشرف کا خیر مقدم کیا۔اس موقع امریکہ کی قائم مقام سفیر نیٹلی بیکر، وفاقی وزیر خزانہ محمد اورنگ زیب،سیاسی اکابرین اوراعلی سول و عسکری حکام بھی موجود تھے۔

پی ایس ایل کے فائنل میچ میں پاک بحریہ کے بہادر سپوتوں کو زبردست خراج تحسین پیش کیا گیا۔

(جاری ہے)

اس دوران معروف گلوکاروں نے ملی نغمے پیش کئے ،شائقین کا جوش و خروش دیدنی تھا جبکہ ہر طرف قومی پرچموں کی بہارتھی ۔ اس موقع پر قذافی اسٹیڈیم پاکستان زندہ باد کے نعروں سے گونج اٹھا۔لاہور قلندرز اور کوئٹہ گلیڈی ایٹرز کے فائنل میچ کے دوران پاک بحریہ کے ساتھ بھرپور یکجہتی کا اظہار کیا گیا۔پاک بحریہ کی پیشہ وارانہ صلاحیتوں اور تیاریوں کو سراہا گیا۔ محسن نقوی نے کہا کہ پاک بحریہ کی بھرپور تیاریوں کے باعث دشمن ہماری سمندری حدود پر حملہ کرنے کی جرات نہ کر سکا،زندہ قومیں اپنے ہیروز کو ہمیشہ یاد رکھتی ہیں،10 مئی کا دن پاکستان کی دفاعی تاریخ کا روشن ترین باب ہے۔