ایمل ولی نے منشیات سے متعلق متنازع ریمارکس پر چیئرمین پی ٹی اے میجر جنرل (ر) حفیظ الرحمان کی معافی قبول کرلی

پشاور(اردوپوائنٹ اخبار تازہ ترین۔27 مئی 2025)عوامی نیشنل پارٹی (اے این پی) کے صدر ایمل ولی نے منشیات سے متعلق متنازع ریمارکس پر چیئرمین پی ٹی اے میجر جنرل (ر) حفیظ الرحمان کی معافی قبول کرلی، ایمل ولی نے پشتون روایات کے تحت چیئرمین پی ٹی اے کا جرگہ قبول کر لیا، تفصیلات کے مطابق چیئرمین پی ٹی اے میجر جنرل (ر) حفیظ الرحمان نے پشاور میں باچا خان مرکز کا دورہ کیا۔

اس اس دوران اپنی جانب سے دئیے جانے والے متنازع بیان پر جرگے کی درخواست کی۔چیئرمین پی ٹی اے میجر جنرل (ر) حفیظ الرحمان باچا خان مرکز پہنچے جہاں ایمل ولی نے مہمانوں کا استقبال کیا۔چیئرمین پی ٹی اے نے کہا کہ جو واقعہ پیش آیا وہ غلط فہمی کی بنیاد پر ہوا۔ واقعے پر اس روز بھی معذرت کی تھی اور گلے دور کرنے باچا خان مرکز آیا ہوں۔

(جاری ہے)

انہوں نے کہا کہ ایمل ولی اور ان کے خاندان کو نہایت عزت و احترام کی نگاہ سے دیکھتا ہوں۔

باچا خان مرکز تمام مظلوموں اور پشتونوں کا گھر ہے یہاں جرگے ہی ہوتے ہیں۔اس موقع پر عوامی نیشنل پارٹی کے سربراہ ایمل ولی خان کا کہنا تھا کہ باچا خان مرکز تمام مظلوموں اور پشتونوں کا گھر ہے یہاں جرگے ہوتے ہیں اور پشتون روایات کا پاس رکھتے ہوئے چیئرمین پی ٹی اے کے جرگے کو قبول کرتا ہوں۔یاد رہے کہ چند روز قبل پاکستان ٹیلی کمیونیکیشن اتھارٹی (پی ٹی اے) کے چیئرمین حفیظ الرحمان کا کہنا تھا کہ سوشل میڈیا اور سیاسی سطح پر میرے خلاف جاری مہم ایک غلط فہمی کا نتیجہ تھا۔

معزز سینیٹر کے ساتھ ایک ہلکے پھلکے انداز میں تبادلہ خیال ہوا اس سے کسی کو رنج پہنچا تو کمیٹی کے روبرو پہلے ہی معذرت کرچکا تھا۔ چیئرمین پی ٹی اے حفیظ الرحمان نے قائمہ کمیٹی میں پیش آنے والے واقعہ پر وضاحت جاری کرتے ہوئے کہا تھا کہ غلط فہمی کی بنیاد پر پیش آنے والے واقعے پر افسوس ہے کسی بھی قسم کی بے ادبی یا غیر پارلیمانی زبان استعمال کرنے کا کوئی ارادہ نہ تھا۔

چیئرمین پی ٹی اے نے اپنے وضاحتی بیان میں پارلیمانی آداب کی مکمل پاسداری کرتے ہوئے ملک و قوم کی خدمات جاری رکھنے کے عزم کا اعادہ بھی کیا تھا۔چیئرمین پی ٹی اے حفیظ الرحمان کا مزید کہنا تھا کہ سینیٹر ایمل ولی خان کے معزز خاندان کو نہایت عزت و احترام کی نگاہ سے دیکھتا ہوں سینیٹ کے تمام اراکین کا دل سے احترام ہے۔قبل ازیںسینیٹ کی قائمہ کمیٹی برائے انفارمیشن ٹیکنالوجی کے اجلاس میں چیئرمین پاکستان ٹیلی کمیونیکیشن اتھارٹی حفیظ الرحمان اور سینیٹر ایمل ولی خان کے درمیان تلخ کلامی ہوئی تھی۔

چیئرمین پی ٹی اے کی جانب سے چرس کے استعمال کے الزام پر سینیٹر ایمل ولی خان اجلاس میں مشتعل ہوگئے تھے انہوں نے چیئرمین پی ٹی اے سے معافی مانگنے کا مطالبہ کیاتھا۔قائمہ کمیٹی کے اجلاس کے دوران چیئرمین پی ٹی اے نے سینیٹر ایمل ولی پر نشہ کرنے کا الزام عائد کرتے ہوئے طنزیہ انداز میں کہا تھا مجھے بھی نشہ دیں۔اے این پی کے سربراہ ایمل ولی یہ سن کر شدید برہم ہوگئے تھے۔

ان کا کہنا تھا کہ آپ کو یہ جرات کس نے دی کہ مجھ سے اس انداز میں بات کریں؟ ایک سرکاری ملازم مجھے کیسے کہہ سکتا تھا کہ تم چرس پی کر آئے ہو؟ یہ انداز بالکل ناقابل قبول تھا۔چیئرمین پی ٹی اے نے اپنی غلطی کا اعتراف کیا تھااور کہا تھاکہ مجھ سے غلطی ہوگئی۔چیئرمین پی ٹی اے ایمل ولی خان سے بار بار معافی مانگتے رہے تھے۔ سینیٹر ایمل ولی خان نے چیئرمین پی ٹی اے کو مخاطب کرتے ہوئے کہا تھا کہ اگر آپ چرس اور شراب پیتے ہیں تو ایسی باتیں کیا کریں۔اس موقع پراے این پی کے سربراہ ایمل ولی خان نے قائمہ کمیٹی سے چیئرمین پی ٹی اے کے خلاف کارروائی کا مطالبہ کیا تھا۔