آپریشن بنیان مرصوص کی شاندار فتح یوم تکبیر کا تسلسل ہے،خورشید احمد قریشی

مظفرآباد(اُردو پوائنٹ اخبارتازہ ترین - این این آئی۔ 28 مئی2025ء)28 مئی 1998ء کو ڈاکٹر عبدالقدیر خان کی نگرانی اور دوسرے قومی سائنسدانوں کی معیت میں جب اس وقت کے وزیراعظم میاں محمد نواز شریف نے ایٹمی دھماکے کیے تو پورا ملک خوشی و مسرت سے جھوم اٹھا تھا۔آپریشن بنیان مرصوص کی شاندار فتح اسی کا تسلسل ہے جس پر اللہ کا شکر ادا کرتے ہوئے میاں محمد نواز شریف،میاں محمد شہباز شریف اور انکی پوری ٹیم سمیت فیلڈ مارشل حافظ عاصم منیر اور افواج پاکستان کیساتھ ساتھ بحری اور فضائیہ کے شاہینوں کو خراج تحسین پیش کرتے ہیں۔

ان خیالات کا اظہار 28مئی یوم تکبیر کے موقع پر مسلم لیگ ن گوجرہ کے راہنما خورشید احمد قریشی نے کیا۔انہوں نے مذید کہا کہ پاکستان ایٹمی قوت رکھنے والا دنیا کا ساتواں اور عالم اسلام کا پہلا ملک ہے۔

(جاری ہے)

بھارت نے 11 مئی کو 1998ایٹم بم کے دھماکوں کے بعد پاکستان کی سلامتی اور آزادی کے لیے خطرات پیدا کر دیے تھے اور علاقے میں طاقت کا توازن تبدیل ہونے سے بھارت کے جارحانہ عزائم کی تکمیل کی راہ ہموار ہو گئی تھی۔

اس عدم توازن کا بھارتی گھمنڈ توڑنے کے لیے پاکستانی عوام کے علاوہ عالم اسلام کے پاکستان دوست حلقوں کی طرف سے سخت ترین دباو ڈالا جا رہا تھا کہ پاکستان بھی ایٹمی تجربہ کر کے بھارت کو منہ توڑ جواب دے۔خورشید احمد قریشی نے کہا کہ پاکستان کے اس اقدام کو امریکا اور یورپ کی تائید حاصل نہ تھی۔ یہی وجہ تھی کہ اس وقت کے امریکی صدر کلنٹن، برطانوی وزیراعظم ٹونی بلیئر اور جاپانی وزیراعظم موتو نے پاکستان پر دباؤ ڈالا کہ پاکستان ایٹمی دھماکہ نہ کرے ورنہ اس کے خلاف سخت ترین پابندیاں عائد کر دی جائیں گی۔

دوسری طرف بھارت نے ایٹمی دھماکہ کرنے کے علاوہ کشمیر کی کنٹرول لائن پر فوج جمع کر دی تھی۔ اس طرح پاکستان بھارت جنگ کا حقیقی خطرہ پیدا ہو گیا تھا۔خورشید احمد قریشی نے کہا کہ بھارت کے تکبر اور غرور کا یہ عالم تھا کہ اس کے سائنسدانوں کی طرف سے یہاں تک کہا گیا کہ CTBT بھارت کے لیے نہیں کمزور ممالک کے لیے ہے۔ اُدھر زوالفقار علی بھٹو شھید نے 1966ء میں تجدید اسلحہ کے حوالے سے بات کرتے ہوئے کہا تھا کہ اگر بھارت نے ایٹم بم بنا لیا تو چاہے ہمیں گھاس کھانا پڑے، ہم بھی ایٹم بم بنائیں گے۔

خورشید احمد قریشی کا کہنا تھاکہ امریکا نے وزیراعظم نواز شریف کو ایٹمی دھماکے کرنے سے روکنے کے لیے ہرممکن اپنی کوششیں آخری وقت تک جاری رکھیں تھیں، مگر اس وقت کے وزیراعظم میاں محمد نواز شریف نے ملکی سلامتی اور قومی خود مختاری پر کسی قسم کی سودے بازی سے صاف انکار کر دیا تھا۔انہوں نے ڈاکٹر عبد القدیر خان،میاں محمد نواز شریف،فیلڈ مارشل حافظ عاصم منیر بری بحری اور فضائیہ کے شاہینوں افواج پاکستان کے دلیر محب وطن جزبہ جہاد سے سرشار آفیسران و جوانوں کے علاؤہ عوام الناس کو شاندار الفاظ میں خراج تحسین پیش کرتے ہوئے کہا کہ آپریشن ںبنیان مرصوص نے وہ تاریخ رقم کی ہے کہ ٹڈی دل بھارت ایک عرصہ تک اپنے زخم چاٹتا رہے گا۔