پاکستان ایک مضبوط دفاعی صلاحیت کا حامل ملک ہے۔سینئر وزیر شرجیل انعام میمن

بدھ 28 مئی 2025 23:20

لاڑکانہ (اُردو پوائنٹ اخبارتازہ ترین - اے پی پی۔ 28 مئی2025ء) یومِ تکبیر کے تاریخی موقع پر سندھ کے سینئر وزیر شرجیل انعام میمن نے قوم کو مبارکباد پیش کرتے ہوئے کہا ہے کہ 28 مئی ہماری قومی تاریخ کا وہ سنہری دن ہے جب پاکستان نے دنیا کو یہ پیغام دیا کہ ہم ایک خودمختار، باوقار اور ناقابلِ تسخیر قوم ہیں۔ یومِ تکبیر کے موقع پر اپنے پیغام میں انہوں نے کہا کہ یہ دن نہ صرف ہماری قومی غیرت کی علامت ہے بلکہ پوری امتِ مسلمہ کے لیے بھی فخر کا باعث ہے کیونکہ اسی دن پاکستان پہلی اسلامی ایٹمی قوت کے طور پر دنیا کے نقشے پر ابھرا۔

شرجیل انعام میمن نے اس موقع پر شہید ذوالفقار علی بھٹو کو خراجِ عقیدت پیش کرتے ہوئے کہا کہ پاکستان کے ایٹمی پروگرام کی بنیاد شہید بھٹو نے اپنے غیر معمولی وژن، جرات مندی اور سیاسی بصیرت سے رکھی۔

(جاری ہے)

انہوں نے کہا کہ عالمی دباؤ اور شدید مخالفت کے باوجود، شہید بھٹو نے اپنی تاریخی قیادت سے پاکستان کو دفاعی لحاظ سے ناقابلِ تسخیر بنانے کی راہ ہموار کی۔

ان کا یہ تاریخی جملہ کہ ’’ہم گھاس کھا لیں گے مگر ایٹم بم ضرور بنائیں گے‘‘آج بھی قومی غیرت، خودداری اور استقلال کی پہچان ہے۔انہوں نے مزید کہا کہ ہمیں یہ بھی نہیں بھولنا چاہیے کہ شہید محترمہ بینظیر بھٹو نے اپنے والد کے وژن کو عملی جامہ پہناتے ہوئے ملک کو جدید میزائل ٹیکنالوجی سے آراستہ کیا، جس سے پاکستان کا دفاعی نظام مزید مستحکم ہوا۔

شرجیل انعام میمن نے کہا کہ پاکستان کے دفاعی نظام کی مضبوطی میں بھٹو خاندان کا کردار ناقابلِ فراموش ہے اور ان کی قیادت میں ایک ایسا خواب حقیقت بنا جو آج ہماری قومی سلامتی کی ضمانت ہے۔یومِ تکبیر کے موقع پر انہوں نے پاکستان کے ایٹمی پروگرام کی تکمیل میں حصہ لینے والے تمام سائنسدانوں، انجینئرز، افواجِ پاکستان اور سیاسی قیادت کو بھی زبردست خراجِ تحسین پیش کیا اور کہا کہ ان سب کی قربانیوں اور محنتوں کی بدولت آج پاکستان ایک مضبوط دفاعی صلاحیت کا حامل ملک ہے۔