Live Updates

عید سے قبل عمران خان کی رہائی کی باتیں جھوٹی ہیں، نعیم حیدر پنجوتھا

بانی پی ٹی آئی کی رہائی پر کسی قسم کے کوئی مذاکرات نہیں ہو رہے ،کوئی ڈیل یا ڈھیل نہیں ہو رہی،عمران خان نے حتمی طور پر واضح کر دیا ہے ڈیل کسی صورت نہیں ہو گی، وکیل بانی پی ٹی آئی کی میڈیا سے گفتگو

فیصل علوی ہفتہ 31 مئی 2025 12:22

عید سے قبل عمران خان کی رہائی کی باتیں جھوٹی ہیں، نعیم حیدر پنجوتھا

راولپنڈی(اردوپوائنٹ اخبار تازہ ترین۔31 مئی 2025)بانی پی ٹی آئی کے وکیل نعیم حیدر پنجوتھا کا کہنا ہے کہ عید سے قبل عمران خان کی رہائی کی باتیں جھوٹی ہیں، بانی پی ٹی آئی کی رہائی پر کسی قسم کے کوئی مذاکرات نہیں ہو رہے، کوئی ڈیل یا ڈھیل نہیں ہو رہی، بانی پی ٹی آئی نے حتمی طور پر واضح کر دیا کہ ملک کی خاطر جیل یا پھر بات کرو، ڈیل کسی صورت نہیں ہو گی، انسداد دہشتگردی کی عدالت میں پیشی کے موقع پر میڈیا سے گفتگو کرتے ہوئے بانی پی ٹی آئی کے وکیل نے کہا کہ بانی پی ٹی آئی عمران خان کو جیل میں کہا گیا کہ 9 مئی پر معافی مانگیں تو سب ٹھیک ہو گا۔

بانی نے کہا 9 مئی کی فوٹیج لائیں جو ذمہ دار نکلے سخت سزا دی جائے۔ معافی وہ مانگے جس نے 9 مئی کرایا ہے۔3 سال قبل بانی پی ٹی آئی کو آفر کی گئی کہ 3 سال چپ رہیں سب ٹھیک کر دیا جائے گا تو عمران کا جواب تھا کہ 3 سال کیا 3 منٹ بھی چپ نہیں رہوں گا۔

(جاری ہے)

انہوں نے کہا کہ بانی پی ٹی آئی نے دوٹوک جواب دیا ہے کہ کسی صورت نہیں جھکوں گا۔ ہمیں انصاف فراہم نہ ہوا تو اس کی ذمہ دار عدلیہ ہو گی۔

عمران خان نے حتمی طور پر واضح کر دیا کہ ملک کی خاطر جیل یا پھر بات کرو ڈیل کسی صورت نہیں ہو گی۔ وکیل بانی پی ٹی آئی نعیم حیدر پنجوتھاکا مزید کہنا تھا کہ بانی پی ٹی آئی نے 3 نکا ت،بھارت کی جارحیت، دہشت گردی اور معاشی معاملات پر مذاکرات کی حامی بھری ہے۔26 ویں ترمیم کا مقصد فراڈ الیکشن کو تحفظ اور ہمیں سزا دینا تھا۔ اب ہمیں 27 ویں آئینی ترمیم کی دھمکیاں دی جارہی ہیں۔

ترامیم جتنی مرضی کر لیں۔ جتنے مرضی ارکان اسمبلی و سینیٹر نااہل قرار دے دیں ہم نہیں جھکیں گے۔قائد حزب اختلاف کو بھی 62 اور 63 کا نوٹس دے دیا گیا ہے۔ان کا یہ بھی کہنا تھا کہ ہمارے ایم این اے کو بغیر ثبوت و شواہد اور ہمیں حتمی دلائل دیئے بغیر سزا دی گئی۔ ہمارے 52 ارکان اسمبلی خلاف کیسز ہیں انہیں سزا دینے کی سازش ہورہی ہے۔دوسری جانب سانحہ 9 مئی کے 11 مقدمات کی سماعت ایک بار پھر بغیر عدالتی کارروائی کے ملتوی کر دی گئی۔

انسداد دہشت گردی کی خصوصی عدالت کے جج امجد علی شاہ کے روبرو سانحہ 9 مئی کے 11 مقدمات کی سماعت ہوئی جس میں پراسیکیوٹر ظہیر علی شاہ، وکلائے صفائی اور سابق وزیر داخلہ شیخ رشید عدالت پہنچے جبکہ بانی پی ٹی آئی عمران خان کی جیل روبکار پر حاضری لگائی گئی۔ بعد ازاں عدالت نے بغیر کسی کارروائی کے سانحہ 9 مئی کے 11 مقدمات کی سماعت 14 جون تک ملتوی کردی۔