Live Updates

مودی کے شکست خوردہ بیانات کا جواب دینا مناسب نہیں سمجھتے

پاکستان بھارت کے ساتھ 4 نکات پر بات چیت کرنے کیلئے تیار ہے، بھارت دنیا میں جہاں بھی چاہے پاکستان سے بات چیت کرسکتا ہے، کشمیر، پانی، تجارت اور دہشتگردی معاملات پر بات چیت کریں گے، وزیراعظم شہبازشریف

ثنااللہ ناگرہ پیر 2 جون 2025 20:22

اسلام آباد (اُردو پوائنٹ اخبارتازہ ترین۔ 02 جون 2025ء) وزیراعظم شہبازشریف نے کہا ہے کہ پاکستان بھارت سے 4 نکات پر بات چیت کرنے کیلئے تیار ہے، بھارت دنیا میں جہاں بھی چاہے پاکستان سے بات چیت کرسکتا ہے۔ وزیراعظم شہبازشریف نے سینئر صحافیوں سے گفتگو کرتے ہوئے کہا کہ پاکستان بھارت سے 4نکات پر بات چیت کیلئے تیار ہے،بھارت کے ساتھ کشمیر، پانی ، تجارت اور دہشتگردی کے معاملات پر بات چیت کریں گے، بھارت دنیا میں جہاں بھی چاہے پاکستان سے بات چیت کرسکتا ہے۔

وزیراعظم نے کہا کہ بھارت سے ہم نے 1971 کا بدلہ لے لیا ہے۔ مودی کے شکست خوردہ بیانات کا جواب دینا مناسب نہیں سمجھتے، مودی اپنی مقامی پریشانی کی وجہ سے بیانات دے رہا ہے، پاکستان نے بھارت کے 4رافیل سمیت 6طیارے مار گرائے۔

(جاری ہے)

انہوں نے کہا کہ ن لیگ کے موجودہ دور حکومت میں کرپشن کا ایک بھی کیس سامنے نہیں آیا ، حکومت نے معاشی استحکام کا سفر طے کرلیا ہے اب معاشی ترقی کا سفر طے کرنا ہے۔

انہوں نے کہا کہ بجٹ کیلئے آئی ایم ایف سے بات چیت کامیاب ہوگئی ہے۔ مزید برآں وزیر اعظم محمد شہباز شریف نے کہا ہے کہ معرکہ حق کی تاریخ ساز فتح کے بعد ملکی اداروں میں پائیدار اصلاحات کے ذریعے ملک کو ایک مستحکم عالمی معیشت بنانے کی جد و جہد میں فتح یاب ہونے کے لیے حکومت پاکستان پر عزم ہے۔ منسٹر آفس کے میڈیا ونگ سے جاری پریس ریلیز کے مطابق وزیراعظم محمد شہباز شریف نے زیر صدارت ایف بی آر کے امور کے حوالے سے جائزہ اجلاس منعقد ہوا۔

وزیراعظم نے ایف بی آر میں جاری اقدامات و اصلاحات کی تھرڈ پارٹی ویلیڈیشن کے لیے عالمی شہرت یافتہ کمپنیوں کی خدمات حاصل کرنے کی ہدایت کرتے ہوئے کہا کہ معرکہ حق کی تاریخ ساز فتح کے بعد ملکی اداروں میں پائیدار اصلاحات کے ذریعے پاکستان کو ایک مستحکم عالمی معیشت بنانے کی جد و جہد میں فتح یاب ہونے کے لیے حکومت پر عزم ہے، تمام شعبوں میں ادارہ جاتی اصلاحات تیزی سے جاری ہیں۔