Live Updates

ملک ایک بار پھر آگے بڑھنا شروع ہوگیا ساری دنیا نے دیکھا کہ پاکستان مضبوط ملک کے طور پر ابھر کر سامنے آیا، نواز شریف

پاکستان کے دنیا میں اچھے دوست ہیں جنہوں نے ہمیشہ ساتھ دیا، تمام دوست ممالک پاکستان کو سپورٹ کرتے ہیں، شہباز شریف اور مریم نواز کے اچھے کاموں کی وجہ سے عوام نے ضمنی الیکشن میں ووٹ دیا،صدر ن لیگ کی لندن میں میڈیا سے گفتگو

فیصل علوی منگل 3 جون 2025 13:55

ملک ایک بار پھر آگے بڑھنا شروع ہوگیا ساری دنیا نے دیکھا کہ پاکستان مضبوط ..

لندن(اردوپوائنٹ اخبار تازہ ترین۔03 جون 2025)پاکستان مسلم لیگ ن کے صدر نواز شریف نے کہا ہے کہ ملک ایک بار پھر آگے بڑھنا شروع ہوگیا ساری دنیا نے دیکھا کہ پاکستان ایک مضبوط ملک کے طور پر ابھر کر سامنے آیا ، پاکستان کے دنیا میں اچھے دوست ہیں جنہوں نے ہمیشہ ساتھ دیا، تمام دوست ممالک پاکستان کو سپورٹ کرتے ہیں، لندن میں میڈیا سے گفتگو کرتے ہوئے سابق وزیراعظم کا کہنا ہے کہ پوری دنیا کی نظریں مسئلہ کشمیر پر لگی ہوئی ہیں۔

اقوام متحدہ کو احساس ہونا چاہیے کہ کشمیر پر منظور شدہ قراردادوں پر عمل ہونا چاہیے۔ شہباز شریف اور مریم نواز کے اچھے کاموں کی وجہ سے عوام نے ضمنی الیکشن میں ووٹ دیا۔مسلم لیگ ن کی حکومت کے اقدامات سے عوام کو ریلیف ملنا شروع ہوگیا۔لوگ دیکھ رہے ہیں کہ پنجاب میں حالات دن بدن بہتر ہوتے جارہے ہیں۔

(جاری ہے)

انہوں نے کہا کہ ن لیگ کی حکومت کے اقدامات کے معیشت اور سیاست پر اچھے اثرات پڑ رہے ہیں۔

مسلم لیگ ن کی حکومت کے اقدامات سے لوگوں کو ریلیف مل رہا ہے۔صدر ن لیگ نواز شریف نے گفتگو کرتے ہوئے مزید کہا کہ مریم نواز کی قیادت میں پنجاب حکومت بھی بہت کام کر رہی ہے۔ اب پاکستان ایک بار پھر آگے بڑھنا شروع ہوگیا ہے جو خوشی کی بات ہے۔ساری دنیا نے دیکھا کہ پاکستان ایک مضبوط ملک کے طور پر ابھر کر سامنا آیا۔2017 میں ہر بندہ تعریف کر رہا تھا کہ پاکستان درست سمت کی طرف جارہا ہے اور آثار تھے کہ پاکستان ترقی کی طرف جاتا لیکن سازشوں نے ملک کو تباہی سے دو چار کر دیا۔

واضح رہے کہ اس سے قبل بھی گزشتہ روز پاکستان مسلم لیگ ن کے صدر نواز شریف نے کہا تھا کہ لوگ ہم پر اعتماد کر رہے ہیں اور کام کوہی ووٹ ملتا ہے، لوگ کام کو ووٹ دیتے تھے۔ سیاست کے ساتھ ساتھ کام بھی ہونا چاہئے تھا۔ن لیگ نے ہی دفاع کو مضبوط بنایا اور ایٹمی دھماکے کئے تھے۔لندن میں ایوان فیلڈ پہنچنے پر صحافیوں سے گفتگو کرتے ہوئے سابق وزیراعظم کا کہنا تھا کہ سمبڑیال کاالیکشن جیتنے پر اللہ کا شکر ادا کرتے ہیں۔

مسلم لیگ ن ملک کی ترقی میں اپنا کردار ادا کر رہی تھی۔ لوگ ہم پر اعتماد کر رہے ہیں پچھلی حکومت نے ملک کا برا حال کر دیا تھا۔ ملک بہتر ہو رہا تھا معیشت مضبوط ہو رہی تھی۔ہمارے زمانے میں 4 سال تک روپیہ مستحکم رہا شرح نمو 7 کو چھو رہی تھی۔ پچھلی حکومت نے جو ملک کا حال کیا تھا مسلم لیگ بتدریج اسے بہتر بنارہی تھی۔ ہر چیز استحکام کی جانب واپس لوٹ رہی ہے۔ ملکی حالات بہتر ہورہے ہیں۔ان کا کہنا تھا کہ ہم نے ہی چین کے ساتھ مل کر جے ایف17تھنڈر طیارے بنائے تھے۔پاکستان کو میزائل ٹیکنالوجی دی تھی۔