کیسکونے کوئٹہ شہرمیں شبہازٹاون فیڈرکے بعد نواںکلی فیڈرکوبھی لوڈشیڈنگ سے مستثنیٰ قراردے دیا،کیسکو ترجمان

کوئٹہ(اُردو پوائنٹ اخبارتازہ ترین - این این آئی۔ 04 جون2025ء)وفاقی وزیر برائے توانائی (پاور ڈویژن) حکومت پاکستان،کیسکوبورڈ آف ڈائریکٹرز اورچیف ایگزیکٹوآفیسرانجینئریوسف شاہ خان کی خصوصی ہدایات پر صارفین کی سہولت اور عوامی مطالبہ کے پیش نظر کیسکولوڈشیڈنگ کے خاتمہ کیلئے خصوصی اقدامات اُٹھارہی ہے ۔صوبائی دارالحکومت کوئٹہ شہرکے مختلف علاقوںمیں بجلی کی ڈسٹری بیوشن لائنز یعنی11Kvفیڈروں کو بجلی چوری سے پاک کرنے کا کام تیزی سے جاری ہے اور اس مہم کے تحت سب ڈویژن کی سطح پر 11Kv فیڈروں پر سپیشل کامبنگ و میٹرسیکورنگ یعنی میٹروں کی نمایاں جگہ پر دوبارہ تنصیب کاعمل جاری ہے ۔

اس سلسلے میں کیسکو زرغون ڈویژن نے 11kVنواں کلی فیڈر پر سپیشل کامبنگ و میٹرسیکورنگ یعنی میٹروں کی نمایاں جگہ پر دوبارہ تنصیب کا عمل مکمل کرلیا ہے جس کے بعد اب11kV نوا ںکلی فیڈر کو لوڈ شیڈنگ فری قرار دیا گیا ہے یعنی اب اس فیڈر پر لوڈ شیڈنگ نہیں کی جائے گی۔

(جاری ہے)

علاوہ ازیںکوئٹہ شہرکے 11kVطوغی روڈ، کاسی ون، جی او آر ممتاز،نواںکلی بائی پاس ، کچلاک سٹی ، اے ون سٹی، سریاب ون، پی اے ایف، نیوجان محمد، سیٹلائٹ ٹاون، خیر بخش مری اور نیو پشتون آباد فیڈروں پراسپیشل کامبنگ و میٹرسیکورنگ کاکام بھی تیزی سے کام جاری ہے اور جلدان فیڈروں پر اسپیشل کامبنگ کاکام مکمل کر کے انھیں بھی لوڈ شیڈنگ فری قرار دیا جائے گا۔

چیف ایگزیکٹوآافیسرکیسکوانجینئریوسف شاہ خان اس مہم کی ذاتی طورپر خود نگرانی کرہے ہیں اور روزانہ کی بنیاد پرکام کی رفتارسے متعلق رپورٹ کاجائزہ لے رہے ہیں اوراس موقع پرانہوںنے کہاکہ ہماراعزم ہے کہ ہم کوئٹہ شہرکو لوڈشیڈنگ سے مستثنیٰ قرار دیں لیکن اس کے لئے ضروری ہے کہ صارفین کیسکوسے تعاون کریں اور بجلی چوری روکنے میں اپنااپناانفرادی کرداراداکریں کیونکہ اس کابراہ راست فائدہ تمام صارفین کوہو گا ۔

انہوںنے کہاکہ بجلی چوری اور بلوںکی عدم ادائیگی کے باعث صارفین کو لوڈشیڈنگ جیسے مسائل کاسامنا کرناپڑرہاہے جس کیلئے ضروری ہے کہ صارفین بجلی بلوںکی بروقت ادائیگی کریں۔کیسکو سربراہ نے کہاکہ اسپیشل کامبنگ مہم کے تحت کوئٹہ سے باہر صوبہ کے تمام ڈسٹرکٹ ہیڈکوارٹرزکے علاقوں میں بھی کام شروع کردیاگیاہے۔ برقی میٹروں کی محفوظ اور نمایاں جگہوں پر از سرے نوتنصیب کا عمل ایک صارف دوست نظام ہے جس سے صارفین کو بجلی کی بلاتعطل فراہمی ممکن ہو سکے گی اوراس مہم کی کامیابی سے غیر قانونی طورپر لگائے گئے کنکشنز کا خاتمہ کے ساتھ ساتھ 11Kvفیڈروں پرلوڈشیڈنگ بھی ختم کیاجاسکے گا۔

تاکہ نیشنل الیکٹرک پاور ریگولیٹری اتھارٹی(نیپرا) کی حفاظتی اصولوں کے مطابق برقی میٹروںکو عوامی املاک سے ہٹاکر بجلی کے کھمبوںپردوبارہ تنصیب کے عمل کو یقینی بنایاجائے ۔ اس مہم کامقصد عوام کے جان و مال کی حفاظت کے ساتھ ساتھ درست اور بروقت میٹرریڈنگ کو یقینی بناناہے،برقی میٹروں کی محفوظ اور نمایاں جگہوں پر از سرے نوتنصیب کا عمل زیادہ قابل اعتبار اور صارف دوست نظام کی جانب ایک سنگ میل ثابت ہوگا جس کے بعد بجلی چوری کی روک تھام میں بھی خاطر خواہ مددملے گی ۔

اس کے علاوہ اس مہم کی کامیابی سے صارفین کوبھی خاطر خواہ فائدہ حاصل ہوسکے گااور اُنھیں بہتر وولٹیج کے ساتھ بلاتعطل بجلی کی فراہمی بھی یقینی بنائی جاسکے گی ۔واضح رہے کہ اس منصوبہ کے پہلے مرحلہ میں کوئٹہ شہرمیں کچہری سب ڈویژن کی11Kv شہبازٹاون فیڈرکاانتخاب کیاگیاجس پر سپیشل کامبنگ ومیٹرسیکورنگ کاکام مکمل کرکے اس فیڈرکو لوڈشیڈنگ فری قراردے دیاگیا اب دیگر فیڈروں پر بھی یہی عمل دہرایاجارہاہے ۔

کیسکونے اپنے تمام صارفین سے اپیل کی ہے کہ کوئٹہ شہر کو لوڈشیڈنگ فری بنانے کے اس منصوبہ کی کامیابی کیلئے تعاون کریں اور بجلی چوری کی روک تھام کیلئے اپناانفرادی کرداراداکریںنیز صارفین اپنے اردگرد بجلی چوری جیسے ناجائز عمل کے مرتکب افراد کی بھی نشاندہی کریں تاکہ آپ کاجائز حق آپ کو مل سکے ۔