افواج پاکستان ہر قسم کی دہشت گردی کے خاتمے کیلئے پرعزم ہے،سردارعتیق احمد

مظفرآباد/دھیرکوٹ(اُردو پوائنٹ اخبارتازہ ترین - این این آئی۔ 05 جون2025ء) آل جموں وکشمیرمسلم کانفرنس کے صدر وسابق وزیراعظم سردارعتیق احمدخان نے کہا کہ افواج پاکستان ہر قسم کی دہشت گردی کے خاتمے کیلئے پٴْرعزم ہے۔بلوچستان سے فتنہ الہندوستان کا ہر قیمت پر خاتمہ ہوگا.بھارتی بیانیے کو ہر محاذ پر ناکامی کا سامنا کرنا پڑا آج بھارت پوری دنیا میں رسوا ہورہا ہے۔

ان خیالات کااظہارانہوں نے مجاہد اول ہائوس غازی آباد میں کارکنان مسلم کانفرنس سے گفتگو کرتے ہوئے کیا۔انہوں نے کہا کہ فیلڈ مارشل عاصم منیر کی حکمت عملی سے کامیابی ملی، اللّٰہ تعالیٰ نے ہر محاذ پر پاکستانی کو کامیابی عطا کی۔انہوں نے کہا کہ ہم نے عسکری ہی نہیں بلکہ سفارتی محاذ پر بھی بھارت کو شکست دے دی ہے۔

(جاری ہے)

بھارتی میڈیا نے جھوٹ اور فیک نیوز کا سہارا لیا، پاکستانی میڈیا نے مثبت کردار ادا کیا، کشیدہ صورتحال میں پاکستانی قوم نے بھرپور اتحاد اور یک جہتی کا مظاہرہ کیا، معرکہ حق اور آپریشن بنیان مرصوص ہمیشہ یاد رکھا جائے گا.بلوچستان میں فتنہ الہندوستان دہشت گردی میں ملوث ہے، بھارتی نیوی کا حاضر سروس کمانڈر کلبھوشن بلوچستان سے پکڑا گیا۔

انہوں نے کہا کہ بھارت پاکستان سمیت مختلف ملکوں میں دہشت گردی میں ملوث ہے، بھارتی دہشت گردی کینیڈا، امریکا اور آسٹریلیا تک پہنچ چکی ہے، دوسرے ملکوں میں دہشت گردی بھارت کی ریاستی پالیسی ہے، بھارت نے دہشت گردی کو اپنی خارجہ پالیسی کا اہم حصہ بنالیا ہے۔ان کا کہنا ہے کہ پوری دنیا نے دیکھا کہ جعفر ایکسپریس کے معاملے پر بھارت جشن منارہا تھا، جعفر ایکسپریس واقعہ کے بعد بھارتی میڈیا نے دہشت گردوں کو خصوصی کوریج دی، خضدار میں دہشت گردی کے واقعہ میں معصوم بچوں کو نقصان پہنچایا گیا۔

نریندر مودی نے 1971ء میں مکتی باہنی کی حمایت کا اعتراف کیا، مودی بار بار اپی تقاریر میں بلوچستان کا نام لے رہا ہے، بلوچستان کے نوجوانوں کو گمراہ کرنے کے لیے بھارت پروپیگنڈا کررہا ہے، ہر فورم پر شکست کے بعد بھارت جھوٹ پر مبنی پروپیگنڈا کر رہا ہے، پہلگام واقعہ پر پاکستان نے غیر جانبدارانہ، شفاف عالمی تحقیقات کی پیشکش کی۔انہوں نے کہا بلوچستان پاکستان کی لائف لائن ہے، امن و استحکام کا عمل آگے بڑھائیں گے، روایتی جنگ کی طرح بھارتی پراکسیز کو بھی شکست ہوگی، بھارت کا گمراہ کن پروپیگنڈا کسی صورت کامیاب نہیں ہوگا۔

دریں اثناء صدرمسلم کانفرنس نے رائے کھیتر میں مجاہد اول کے دیرینہ ساتھی سینئرمسلم کانفرنسی رہنما سردار تجمل عباسی کی عیادت کی ۔بعدازاں انہوںنے بھال بگلہ میں راجہ محمد فرید خان کی وفات پران کے بھائی راجہ صادق خان سے تعزیت کی اور ان کی درجات بلندی کیلئے خصوصی دعا کی۔