وفاقی بجٹ متوازن ،تنخواہ دار طبقے کو ٹیکس میں ریلیف دیا گیا ،افراط زر کی شرح 7 فیصد رکھی گئی ہے،چوہدری نعیم کریم

بدھ 11 جون 2025 20:10

کوئٹہ(اُردو پوائنٹ اخبارتازہ ترین - این این آئی۔ 11 جون2025ء)پاکستان مسلم لیگ (ن) کے مرکزی سینئر رہنما چوہدری نعیم کریم نے وفاقی بجٹ میں تنخواہ دار طبقے کو ریلیف دینے ،تعلیم ،صحت ،روزگار ،تجارت میں بہتری کیلئے اقدامات تجویز کرنے کا خیر مقدم کرتے ہوئے کہا کہ وزیراعظم کی قیادت میں وفاقی حکومت نے ایک عوام دوست اور متوازن بجٹ پیش کیا ہے جس پر وزیراعظم اورانکی پوری ٹیم مبارکباد کی مستحق ہے۔

یہاں جاری ہونے والے ایک بیان میں چوہدری نعیم کریم نے کہا کہ آئندہ مالی سال 2025-26کا وفاقی بجٹ ایک متوازن بجٹ ہے جس میں تنخواہ دار طبقے کو ٹیکس میں ریلیف دیا گیا ہے افراط زر کی شرح 7 فیصد رکھی گئی ہے،ترقیاتی پروگرام کیلئے ایک ہزار ارب روپے کی تجویز دی گئی ہے جس سے روزگار کے مواقع پیدا ہوں گے۔

(جاری ہے)

انہوں نے کہا کہ وزیراعظم نے تنخواہ دار سرکاری ملازمین کے لئے 10 فیصد اضافہ کی منظوری دی ہے جبکہ وزارت خزانہ نے چھ سے سات فیصد اضافے کی تجویز پیش کی تھی تنخواہوں میں تفاوت کو کم کرنے کے لئے اہل ملازمین کی تنخواہوں میں 30 فیصد اضافہ بھی کیا گیا ہے۔

انہوں نے کہا کہ ماحولیات کے حوالے سے حکومت نے زبانی جمع خرچ نہیں بلکہ عملی اقدامات کئے ہیں، عالمی سطح پر بھی اس حوالے سے بہتر انداز میں پاکستان آگے بڑھ رہا ہے۔ انہوں نے کہا کہ وفاقی بجٹ میں بلوچستان کیلئے 18ارب روپے رکھنے کی تجویز دی گئی ہے جبکہ بلوچستان میں 4دانش سکولوں کا قیام ، چمن ،کوئٹہ،کراچی قومی شاہراہ کی تعمیر کیلئے 1کھرب روپے ،ڈیموں کی تعمیر کیلئے 5ارب روپے رکھے گئے ہیںجس سے صوبے میں ترقی و خوشحالی کے نئے دور کا آغاز ہوگاانہوں نے مزید کہا کہ ایف بی آر، کسٹمز کے شعبوں میں اصلاحات پر بھی کام ہو رہا ہے جس سے کاروبار اور سرمایہ کاری کو فروغ ملے گا اور روزگار کے مواقع پیدا ہوں گے۔

چوہدری نعیم کریم نے کہا کہ نئے مالی سال کا بجٹ عوام کیلئے خوشی اور خوشحالی لائے گا معیشت کی ترقی کا ثمر ہر فرد تک پہنچانے کیلئے پر عزم ہیںپاکستان معاشی گرداب سے نکل کر ترقی کی راہ پر گامزن ہوچکا ہے۔انہوں نے کہاکہ تعلیم اورصحت کیلئے ریکارڈ بجٹ مختص کرنا پاکستان مسلم لیگ(ن) کی قیادت کے عوام سے لگاؤ کا منہ بولتا ثبوت ہے آئی ایم ایف پروگرام سے نجات حاصل کرنے کا عزم شاندار مستقبل کی نوید ثابت ہوگا۔بجٹ میں متوسط طبقے کو ریلیف دیاگیا۔