ایم کیو ایم آزاد کشمیر کی ایران پر اسرائیلی حملوں کی شدید مذمت۔ایم کیو ایم آزادکشمیر

بھارت کی ایران میں شراکت داری دراصل جاسوسی کا نیٹ ورک تھا ، امریکہ اور اسرائیل کی سہولت کاری میں بھارت کا مرکزی کردار بے نقاب ہو چکا ہے

اتوار 15 جون 2025 14:55

مظفرآباد(اُردو پوائنٹ اخبارتازہ ترین - این این آئی۔ 15 جون2025ء)متحدہ قومی موومنٹ آزاد کشمیر کے مرکزی سیکرٹری جنرل عزت علی نے ایران پر اسرائیلی حملوں کو بین الاقوامی قوانین، سفارتی اقدار اور انسانی ضمیر کے منافی قرار دیتے ہوئے اس کی شدید الفاظ میں مذمت کی ہے۔ انہوں نے کہا کہ ایران وہ واحد مسلم ملک ہے جس نے ریاست جموں و کشمیر کے مظلوم عوام کے حق خود ارادیت کی ہمیشہ غیر مشروط اور غیر متزلزل حمایت کی ہے۔

انہوں نے مزید کہا کہ ایران نے اپنی خارجہ پالیسی میں ہمیشہ اعتدال کا مظاہرہ کیا ہے اور بھارت کے ساتھ کئی معاملات میں اختلافات کے باوجود اپنے برادر اسلامی ملک پاکستان سے دوستانہ اور ہمسائیگی کے رشتے کسی قیمت پر خراب نہیں ہونے دیے۔ ایران کا یہ طرزِ عمل خطے میں امن اور مسلم امہ کے اتحاد کی علامت رہا ہے۔

(جاری ہے)

عزت علی نے اسرائیل اور امریکہ کے حالیہ رویے کو مسلمانوں کے خلاف عالمی سازش قرار دیتے ہوئے کہا کہ بھارت نے ایران میں مختلف ترقیاتی منصوبوں میں شراکت داری دراصل اس لیے کی کہ وہ وہاں اپنا خفیہ جاسوسی نیٹ ورک قائم کرے۔

ان کا کہنا تھا کہ بھارت کا کردار’’منہ میں رام رام، بغل میں چھری‘‘ جیسا ہے، جو ایران کی قربت حاصل کر کے دراصل اسرائیل اور امریکہ کی سہولت کاری کرتا رہا ہے۔انہوں نے تشویش کا اظہار کرتے ہوئے کہا کہ اس وقت جو خبریں اور تجزیے سامنے آ رہے ہیں، ان سے یہ واضح ہوتا ہے کہ ایرانی ٹاپ لیڈرشپ کو جس طرح نشانہ بنایا گیا، وہ محض داخلی کمزوری نہیں بلکہ ایک عالمی سازش کا شاخسانہ ہے جس میں بھارتی خفیہ نیٹ ورکس کا کردار سب سے اہم ہے۔

عزت علی نے انکشاف کیا کہ بھارتی نیٹ ورک نہ صرف ایران میں متحرک ہے بلکہ اسی کے ذریعے پاکستان کے صوبہ بلوچستان میں بھی مسلسل مداخلت کی جا رہی ہے۔ انہوں نے عالمی برادری، او آئی سی اور اقوام متحدہ سے مطالبہ کیا کہ وہ ایران کے خلاف اسرائیلی جارحیت اور بھارت کی خطے میں تخریبی سرگرمیوں کا فوری نوٹس لیں اور ایسے اقدامات کیے جائیں جو خطے میں امن، خودمختاری اور ہمسائیگی کے اصولوں کا تحفظ کر سکیں۔