وزیراعظم ذاتی مفادات سے بالاتر ہو کر ملک کو سیاسی بحران سے نکالنے کیلئے عملی اقدامات کریں، اسد عمر

مسلم لیگ ن کو اپنی سیاست کا جائزہ لینا ہو گا اور اسے بدلنے کی ضرورت ہے، ملکی استحکام کیلئے سنجیدہ اقدامات کی ضرورت ہے، حکومت کو چاہیے کہ ہمارے ساتھ بیٹھ کر ایک مشترکہ قومی ایجنڈا تیار کرے، رہنماء پی ٹی آئی کی عدالت کے باہر میڈیا سے گفتگو

فیصل علوی پیر 16 جون 2025 11:59

وزیراعظم ذاتی مفادات سے بالاتر ہو کر ملک کو سیاسی بحران سے نکالنے کیلئے ..

لاہور(اردوپوائنٹ اخبار تازہ ترین۔16جون 2025)پاکستان تحریک انصاف کے رہنماء اسد عمر نے کہا ہے کہ وزیراعظم شہباز شریف ذاتی مفادات سے بالاتر ہو کر ملک کو سیاسی بحران سے نکالنے کیلئے عملی اقدامات کریں، ملکی استحکام کیلئے سنجیدہ اقدامات کی ضرورت ہے، حکومت کو چاہیے کہ ہمارے ساتھ بیٹھ کر ایک مشترکہ قومی ایجنڈا تیار کرے،لاہور میں انسداد دہشت گردی کے باہر میڈیا سے گفتگو کرتے ہوئے رہنماء پی ٹی آئی کاکہنا ہے کہ پاکستان اس وقت ایک خطرناک سیاسی دلدل میں پھنسا ہوا ہے جس سے نکلنے کیلئے تمام سیاسی جماعتوں کو مل بیٹھ کر لائحہ عمل طے کرنا ہو گا۔

مسلم لیگ ن کو اپنی سیاست کا جائزہ لینا ہو گا اور اسے بدلنے کی ضرورت ہے۔ نواز شریف اور شہباز شریف 70 سال کی عمر سے اوپر جا چکے ہیں۔

(جاری ہے)

اب اگلی نسل مریم نواز اور حمزہ شہباز کی ہے جنہوں نے اگلے 20 سے 30 سال سیاست کرنی ہے۔اسد عمر نے وزیراعظم پر تنقید کرتے ہوئے کہا کہ شہباز شریف وزیراعظم کی کرسی پر ضرور بیٹھے ہیں لیکن وہ عوام کے ووٹوں سے نہیں بلکہ کسی اور طریقے سے وہاں پہنچے ہیں۔

مسلم لیگ (ن) کا یہ دعویٰ بے بنیاد ہے کہ انہوں نے ریاست بچانے کیلئے سیاست قربان کی۔ ریاست پہلے ہی مضبوط تھی۔ مسلم لیگ ن کو اپنی سیاست کا جائزہ لینا ہو گا اور اسے بدلنے کی ضرورت ہے۔انہوں نے کہا کہ موجودہ بجٹ کو دیکھ کر ایسا محسوس ہوتا ہے کہ جیسے ایک نہیں دو پاکستان بن چکے ہیں صرف تنخواہ دار طبقے سے ڈیڑھ ہزار ارب روپے سے زائد اکٹھے کئے گئے جبکہ تاجر طبقے سے محض 10 کروڑ روپے جمع کئے جا سکے۔

جو طاقتور ہے حکومت اس سے پیسہ نکلوانے میں ناکام ہے۔ انہوں نے سوال اٹھایا کہ کیا اس بجٹ میں کسی بڑے جاگیردار یا تاجر پر کوئی ٹیکس نظر آ رہا ہے؟۔میڈیا سے گفتگو کرتے ہوئے اسد عمر نے پیٹرولیم مصنوعات پر ممکنہ 90 روپے فی لٹر ٹیکس اور نئی کاربن لیوی کو بھی شدید تنقید کا نشانہ بنایا اور کہا کہ بجٹ خسارہ کم ظاہر کرنے کیلئے 1450 ارب روپے عوام سے لے کر بینکوں میں رکھ دیئے گئے جو دراصل عوام کے ساتھ دھوکہ ہے۔

اسد عمر نے عالمی اور علاقائی خطرات پر بات کرتے ہوئے کہا کہ ہم ایک خطرناک خطے میں زندگی گزار رہے ہیں۔ بھارت نے جب حملہ کیا تو ہماری افواج نے منہ توڑ جواب دیا۔ پاکستان ایک خطرناک علاقے میں واقع ہے جہاں بھارت آج بھی جارحانہ عزائم رکھتا ہے، ہماری افواج نے بھارت کو ہمیشہ ٹھوک کر جواب دیا ہے۔اسرائیل اور ایران کے تنازع کے حوالے سے اسد عمر کا کہنا ہے کہ جس طرح اسرائیل نے ایران پر جارحیت کی ہے اس پر پوری مسلم امہ اور پاکستان کے عوام ایران کے ساتھ کھڑے ہیں۔انہوں نے اسرائیل کی جانب سے ایران پر حملے کی مذمت کرتے ہوئے کہا ہے کہ پوری مسلم امہ کی دعائیں ایران کے ساتھ ہیں۔