نیشنل کمانڈ اتھارٹی سے وابستہ 47 سائنسدانوں اور انجینئرز کو اعزازات سے نوازانے کی پروقار تقریب کا انعقاد

اعزازات چیئرمین جوائنٹ چیفس آف سٹاف کمیٹی، ڈپٹی چیئرمین ڈویلپمنٹ کنٹرول کمیٹی جنرل ساحر شمشاد مرزا (نشان امتیاز ملٹری) نے ایک باوقار تقریب کے دوران چکلالہ گیریژن راولپنڈی میں تقسیم کئے

فیصل علوی منگل 17 جون 2025 16:30

نیشنل کمانڈ اتھارٹی سے وابستہ 47 سائنسدانوں اور انجینئرز کو اعزازات ..

راولپنڈی(اردوپوائنٹ اخبار تازہ ترین۔17جون 2025)پاک فوج کے زیراہتمام چکلالہ گیریژن راولپنڈی میں سول ایوارڈز کی پروقار تقریب کا انعقاد کیا گیا ، نیشنل کمانڈ اتھارٹی سے وابستہ 47 سائنسدانوں اور انجینئرز کو اعزازات سے نوازا گیا،صدر مملکت کی جانب سے نیشنل کمانڈ اتھارٹی کے تحت کام کرنے والے ممتاز سائنسدانوں اور انجینئرز کو ان کی نمایاں خدمات پر سول اعزازات سے نوازا گیا،پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق یہ اعزازات چیئرمین جوائنٹ چیفس آف سٹاف کمیٹی، ڈپٹی چیئرمین ڈویلپمنٹ کنٹرول کمیٹی جنرل ساحر شمشاد مرزا (نشان امتیاز ملٹری) نے ایک باوقار تقریب کے دوران چکلالہ گیریژن راولپنڈی میں تقسیم کئے۔

آئی ایس پی آر کے مطابق چکلالہ گیریژن راولپنڈی میں ہونے والی اس پروقارتقریب میں اعلیٰ عسکری و سویلین حکام، سائنسدانوں، انجینئرز اور ان کے اہلخانہ نے شرکت کی۔

(جاری ہے)

آئی ایس پی آرکاکہنا ہے کہ تقریب کے دوران مجموعی طور پر 47 افسران کو اعزازات دئیے گئے۔ 10 افسران کو ستارہ امتیاز21 افسران کو صدارتی تمغہ برائے حسن کارکردگی عطا کیا گیا۔ 16 افسران کو تمغہ امتیاز سے نوازا گیا۔

آئی ایس پی آر کامزید یہ بھی کہنا ہے کہ یہ اعزازات نیشنل کمانڈ اتھارٹی کے سائنسدانوں اور انجینئرز کی ان خدمات کا اعتراف ہیں جو انہوں نے قومی دفاع، ٹیکنالوجی اور اسٹریٹجک صلاحیتوں کے فروغ کیلئے انجام دیں۔ترجمان پاک فوج کے مطابق چیئرمین جوائنٹ چیفس آف سٹاف کمیٹی، ڈپٹی چیئرمین ڈویلپمنٹ کنٹرول کمیٹی جنرل ساحر شمشاد مرزا نے اپنے خطاب میں ایوارڈ یافتگان کو خراج تحسین پیش کیا اور ان کی خدمات کو پاکستان کے اسٹریٹجک پروگرام اور قومی سلامتی کیلئے ریڑھ کی ہڈی قرار دیا۔انہوں نے سائنس اور ٹیکنالوجی کے شعبے میں خودانحصاری کے حصول کی اہمیت پر زور دیا اور مستقبل میں بھی اسی جذبے سے کام جاری رکھنے کی تلقین کی۔