ججزسینیارٹی اور ٹرانسفر کیس‘ 14 ججز کو چھوڑ کر 15ویں نمبر والے جج کو کیوں ٹرانسفر کیا گیا ۔جسٹس نعیم اخترافغان

اسلام آباد(اُردو پوائنٹ اخبارتازہ ترین - این این آئی۔ 18 جون2025ء)سپریم کورٹ میں بدھ کو ہوئی ججز کی سینیارٹی اور ٹرانسفر سے متعلق اہم کیس کی سماعت کے دوران بانی پاکستان تحریک انصاف کے وکیل ادریس اشرف کو دلائل سے روک دیا گیا۔ عدالت نے ہدایت دی کہ پہلے ایڈووکیٹ جنرل پنجاب اپنے دلائل مکمل کریں کیونکہ ان کے دلائل پر شاید جواب الجواب دینا پڑے گا، لہٰذا بانی پی ٹی آئی کے وکیل ان کے بعد اپنے دلائل پیش کریں۔

ایڈووکیٹ جنرل پنجاب امجد پرویز نے اپنے دلائل میں کہا کہ 1955 میں گورنر جنرل کے آرڈر سے مغربی پاکستان کو ون یونٹ بنایا گیا، تمام ہائیکورٹس کی سطح کی عدالتوں کو یکجا کرکے ایک عدالت قائم کی گئی۔ انہوں نے کہا کہ اٴْس وقت ہائیکورٹس کو یکجا کرتے ہوئے ججز کی گزشتہ سروس کو آنر کیا گیا اور تقرری کی تاریخ پر سینیارٹی لسٹ ترتیب دی گئی۔

(جاری ہے)

انہوں نے مزید کہا کہ 1970 میں ون یونٹ کی تحلیل کے بعد جب ججز کو مختلف ہائیکورٹس میں ٹرانسفر کیا گیا، تب بھی ان کی سابقہ سروس کو تسلیم کیا گیا۔

1976 میں جب سندھ اور بلوچستان ہائیکورٹس کو الگ کیا گیا، تب بھی دونوں عدالتوں میں ٹرانسفر کیے گئے ججز کی سابقہ سینیارٹی برقرار رکھی گئی۔اس موقع پر جسٹس نعیم اختر افغان نے ریمارکس دیے کہ اس کیس میں صورتحال مختلف ہے، ون یونٹ پر نئی عدالتی تشکیل ہوئی تھی، اور تحلیل پر نئی ہائیکورٹس بنی تھیں، جبکہ یہاں اسلام آباد ہائیکورٹ میں ججز کے تبادلے پر کوئی نئی تشکیل یا تحلیل نہیں ہوئی۔

امجد پرویز نے مؤقف اختیار کیا کہ ماضی میں ہمیشہ ججز کی سابقہ سروس کو ٹرانسفر کے وقت تسلیم کیا گیا۔ انہوں نے کہا کہ پرویز مشرف کے سنگین غداری ٹرائل کے لیے اسپیشل کورٹ تشکیل دی گئی تھی، جس میں تین ہائیکورٹس کے ججز شامل کیے گئے تھے اور ان میں سب سے سینئر جج کو عدالت کا سربراہ بنایا گیا تھا۔جسٹس نعیم اختر افغان نے استفسار کیا کہ جوڈیشل کونسل یا آرٹیکل 6 کے تحت بننے والی اسپیشل کورٹ کے ججز مخصوص مدت کے لیے ہوتے ہیں، لیکن یہاں سوال یہ ہے کہ آرٹیکل 200 کے تحت جج کا تبادلہ مستقل ہے یا عارضی جس پر انہوں نے کہا کہ اٹارنی جنرل نے تو واضح کر دیا ہے کہ ججز کا تبادلہ مستقل کیا گیا ہے۔

ایڈووکیٹ جنرل امجد پرویز نے کہا کہ ٹرانسفرنگ جج کی معیاد سے متعلق بھی وہ دلائل دیں گے۔ انہوں نے کہا کہ جہاں آئین میں صدر مملکت کو معیاد طے کرنے کا اختیار دیا گیا ہے، وہیں یہ اختیار موجود ہوتا ہے۔ جسٹس نعیم اختر افغان نے سوال اٹھایا کہ 14 ججز کو چھوڑ کر 15ویں نمبر والے جج کو کیوں ٹرانسفر کیا گیا امجد پرویز نے جواب دیا کہ یہ سمری عام آدمی نے نہیں، بلکہ ججز نے تیار کی، اور ججز آئین و قانون سے بخوبی آگاہ ہوتے ہیں۔

انہوں نے مزید کہا کہ جہاں ہائیکورٹ کے چیف جسٹس کو اضافی جج کی ضرورت ہو، وہاں مدت کا ذکر ہوتا ہے، لیکن ٹرانسفر کی صورت میں تبادلہ مستقل ہی ہوتا ہے۔جسٹس شکیل احمد نے نشاندہی کی کہ ٹرانسفر کے عمل میں سمری میں کہیں بھی ’پبلک انٹرسٹ‘ کا ذکر موجود نہیں، جس پر امجد پرویز نے کہا کہ آرٹیکل 200 میں بھی ’پبلک انٹرسٹ‘ کا لفظ شامل نہیں ہے۔

ایڈووکیٹ جنرل پنجاب کے دلائل مکمل ہونے کے بعد بانی پی ٹی آئی کے وکیل ادریس اشرف نے دلائل کا آغاز کیا۔ عدالت نے کیس کی مزید سماعت کل تک ملتوی کر دی۔ ادریس اشرف کل بھی اپنے دلائل جاری رکھیں گے۔ جسٹس محمد علی مظہر نے ان سے استفسار کیا کہ مزید کتنا وقت درکار ہی جس پر ادریس اشرف نے کہا کہ زیادہ سے زیادہ 15 منٹ مزید چاہئیں ہوں گے۔ اس پر اٹارنی جنرل نے بھی کہا کہ مجھے بھی 15 منٹ لگیں گے۔جس پر جسٹس نعیم اختر افغان نے کہا کہ ذوالفقار علی بھٹو کیس میں ججز وکلائ کو کہتے رہے کہ جلدی دلائل مکمل کر لیں تاخیرنہ کریں، وکلائ کے طویل دلائل کے سبب کیس تاخیر کا شکار ہوتا رہا، ججز ریٹائر ہوتے رہے، یوں ججز ریٹائر ہونے کے سبب ججز کی کمپوزیشن ہی تبدیل ہوگئی۔