ایک کروڑ نوکریوں کا وعدہ کرنے والی جماعت نے 15 ہزار افراد کو برطرف کر دیا،احمد کریم کنڈی

پشاور (اُردو پوائنٹ اخبارتازہ ترین - اے پی پی۔ 18 جون2025ء) پیپلز پارٹی کے پارلیمانی لیڈر احمد کریم کنڈی نے کہا ہے کہ سیاست اورپارٹی کھیل نہیں یہ ایوان غیرمتعلق ہونےجارہی ہے۔خیبرپختونخوا اسمبلی اجلاس سے خطاب احمد کریم کنڈی نے سابق وزیر خزانہ تیمور جھگڑا کو یاد کرتے ہوئے کہا کہ وہ حقیقی اعداد و شمار اسمبلی کے سامنے رکھتے تھے، مگر موجودہ حکومت گزشتہ پانچ سالوں کے درست اعداد و شمار چھپا رہی ہےان کے مطابق ترقیاتی بجٹ کے حوالے سے موجودہ حکومت نے پچھلے دس سالوں میں سب سے کم بجٹ خرچ کیا ہے۔

ان کا کہنا تھا کہ ہم نے ایک ارب ڈالر سے بھی کم خرچ کیا ہے، مگر یہ واضح نہیں کہ قرض کب لیا گیا اور کب واپس کیا جا رہا ہے۔احمد کریم کنڈی نے کہا کہ پیپلز پارٹی کے دور حکومت میں ساتواں این ایف سی ایوارڈ دیا گیا، جس میں صوبوں کے حصے کو 15 فیصد تک بڑھایا گیا۔

(جاری ہے)

دہشت گردی کے خلاف جنگ میں خیبرپختونخوا کو 130 ارب روپے ملے، اور ہم نے آئین میں ترمیم کرکے صوبوں کے حقوق محفوظ کیے۔

بیرسٹر سیف پر تنقید کرتے ہوئے انہوں نے کہا کہ وہ سینیٹ میں صوبوں کے حصے کم کرنے کی قرارداد پیش کر چکے ہیں، مگر ہم نے ان جیسے لوگوں کا راستہ آئین کے ذریعے روکاانہوں نے واضح کیا کہ صرف این ایف سی کی میٹنگ بلانا کامیابی نہیں، بلکہ اس کا عملی نفاذ اصل کامیابی ہے۔احمد کریم نے کہا کہ پی ٹی آئی نے اپنے دور میں نویں این ایف سی ایوارڈ کا انعقاد نہیں کیا، اور اب وقت ہے کہ مرکز سے بات چیت جرگہ کی سطح پر کی جائے۔

پیپلز پارٹی کے رہنما نے کہا کہ صرف تربیلا ڈیم کی مد میں خیبرپختونخوا کا حق 2500 ارب روپے سے زائد بنتا ہے، اور پرویز خٹک نے پن بجلی منافع کو غیر منجمند کروا کے کئی گنا اضافہ کیا۔ موجودہ حکومت کا موازنہ کسی اور سے نہیں بلکہ پرویز خٹک کی حکومت سے کیا جانا چاہیے کیونکہ ان کے دور میں پن بجلی کا صرف ایک منصوبہ 36 میگاواٹ کا مکمل ہواانہوں نے کہا کہ ہم نے آئینی حق ہونے کے باوجود تیل پر ایکسائز ڈیوٹی وفاق سے وصول نہیں کی، اور پانی کی مد میں بھی 8.78 ملین ایکڑ فٹ میں سے 3 ملین کا استعمال ہی نہیں ہو رہا۔

سندھ کو جب ایک ملین سے کم پانی ملا تو وہ اپنا مقدمہ لڑنے نکل کھڑا ہوا۔انہوں نے زرعی انکم ٹیکس پر تنقید کرتے ہوئے کہا کہ 56 لاکھ پر بھی 15 لاکھ اور 15 کروڑ پر بھی 15 لاکھ ٹیکس دینا پڑ رہا ہے، جو ایک ناقابل فہم نظام ہے۔انہوں نے الزام لگایا کہ وزیراعلیٰ اپنی کابینہ کے ہمراہ کور کمانڈر کے پاس کھانے پر گئے، ہمیں فیصلہ سازوں کے ساتھ بیٹھنا ہوگا اور اپنے امن وامان سےمتعلق کچھ کرناہوگا۔

احمد کریم نے ورلڈ بینک کی رپورٹ کا حوالہ دیتے ہوئے کہا کہ خیبرپختونخوا میں چار کروڑ افراد غربت کی لکیر کے نیچے زندگی گزار رہے ہیں، اور ایک کروڑ نوکریوں کا وعدہ کرنے والی جماعت نے اسی اسمبلی کے ذریعے 15 ہزار افراد کو برطرف کر دیا۔انہوں نے تحریک انصاف کی حکومت پر فاٹا ہاؤس جیسے قیمتی اثاثے مقتدر حلقوں کے حوالے کرنے کا الزام بھی عائد کیا، اور مطالبہ کیا کہ فری بجٹ اور پوسٹ بجٹ پروگرامز کا انعقاد کیا جائے، جبکہ این ایف سی اور پن بجلی منافع کے متعلق جرگہ تشکیل دیا جائے۔