Live Updates

سپیشل ٹیکنالوجی زون اتھارٹی نے نوازشریف آئی ٹی سٹی کے سیلی کون بلاک کی منظوری دیدی

23 بڑی آئی ٹی کمپنیوں نے ادارے بنانے کیلئے اراضی بھی حاصل کرلی، نیٹ سول پہلی آئی ٹی یونیورسٹی بنائے گا، روٹس گروپ برطانوی وارک یونیورسٹی کے ساتھ جوائنٹ وینچرکرے گا۔ وزیراعلیٰ مریم نواز کی زیرصدارت اجلاس

ثنااللہ ناگرہ بدھ 18 جون 2025 19:17

سپیشل ٹیکنالوجی زون اتھارٹی نے نوازشریف آئی ٹی سٹی کے سیلی کون بلاک ..

لاہور ( اردوپوائنٹ اخبار تازہ ترین۔ آئی پی اے ۔ 18 جون 2025ء ) وزیراعلیٰ پنجاب مریم نواز شریف کی زیر صدارت خصوصی اجلاس منعقد ہوا جس میں نواز شریف آئی ٹی سٹی پراجیکٹ پر پیش رفت کا جائزہ لیا گیا۔ نوازشریف آئی ٹی سٹی سپیشل ٹیکنالوجی زون اتھارٹی سے منظور شدہ پنجاب کا پہلا ادارہ بن گیا۔ ایس ٹی زیڈ اے نے این ایس آئی ٹیسیلی کون بلاک کی باقاعدہ منظوری دے دی۔

اجلاس میں مزید بتایا گیا کہ نوازشریف آئی ٹی سٹی میں دنیا کے بڑے اور نامور انٹرنیشنل آئی ٹی گروپس نے دلچسپی کا اظہار کیا ہے۔ نوازشریف آئی ٹی سٹی کے سیلی کون بلاک میں 23 بڑی آئی ٹی کمپنیاں ادارے قائم کرنے کو تیار ہیں اوراس سلسلے میں ادارے یا آفس کے قیام کے لئے پلاٹ بھی لے لیے گئے ہیں۔ مزید بتایا گیا کہ لندن کا نامور ایمپیریل کالج نووے کیئر کے اشتراک سے میڈیکل کالج اور ہسپتال بنائے گا۔

(جاری ہے)

نیٹ سول نواز شریف آئی ٹی سٹی میں پاکستان کی پہلی جامع آئی ٹی یونیورسٹی قائم کرے گا۔ روٹس گروپ برطانوی وارک یونیورسٹی کے ساتھ جوائنٹ وینچرکرے گا۔ اسی طرح معروف کمپنیاں ڈیٹا فورٹ اور ماری ٹیک بھی مشترکہ طور پر ٹئیر تھری اور ٹیئر فور ڈیٹا سنٹر بنائیں گے۔ ڈیٹا روکز نے پنجاب کی پہلی ایف ٹی اے سے منظور شدہ لیب بنانے میں دلچسپی کا اظہار کیا ہے۔

سی بی ڈی کے سی ای او عمران امین نے پراجیکٹس پر تفصیلی بریفنگ دی۔ وزیراعلیٰ مریم نواز شریف نے نوازشریف آئی ٹی سٹی کے قیام کے لئے مزید موثر، تیز تر اور ضروری اقدامات کی ضرورت پر زوردیا۔ مزید برآں وزیراعلیٰ پنجاب مریم نواز شریف نے نفرت انگیز تقاریر کے انسداد کے عالمی دن پر اپنے پیغام میں کہا کہ نفرت، تعصب اور تنگ نظری کو ہر محاذ پر شکست دینی ہے۔

نفرت انگیز تقاریرکا زہر ہ معاشروں میں تقسیم، انتشار اور تشدد کو جنم دیتا ہے۔ وزیراعلیٰ مریم نواز شریف نے کہا کہ نفرت انگیز سپیچ کسی ایک فرد پر حملہ نہیں ہوتیں یہ انسانیت کے ضمیر پر وار ہوتی ہیں۔ اسلاموفوبیا نفرت انگیز رویوں کی سب سے خطرناک شکل ہے۔ مسلمانوں کی شناخت، مساجد اور گھروں کو نفرت کا ہدف بنایا جاتا ہے۔ وزیراعلیٰ مریم نوازشریف نے کہا کہ نفرت کی روش امن عالم کے لیے ایک مستقل خطرہ ہے۔ عالمی برادری آزادیِ اظہار کے نام پر نفرت پھیلانے والوں کا محاسبہ کریں۔ وزیراعلیٰ مریم نواز شریف نے کہا کہ کسی کو بھی نفرت کے بیج بونے کی اجازت نہیں دی جائے گی۔ وطن عزیز میں محبت، برداشت اور احترام کو فروغ دیں گے۔