امریکی صدرکی خصوصی دعوت پرفیلڈ مارشل سید عاصم منیر ملاقات کیلئے وائٹ ہاؤس پہنچ گئے

واشنگٹن ( اردوپوائنٹ اخبار تازہ ترین۔ آئی پی اے ۔ 18 جون 2025ء ) فیلڈ مارشل سید عاصم منیر امریکی صدر ڈونلڈ ٹرمپ سے ملاقات کیلئے وائٹ ہاؤس پہنچ گئے، آئی ایس آئی چیف بھی سپہ ساالار کے ہمراہ ملاقات میں شریک ہوں گے۔ غیرملکی میڈیا کے مطابق افواج پاکستان کے فیلڈ مارشل سید عاصم منیروائٹ ہاؤس میں امریکی صدر کی خصوصی دعوت پران سے ملاقات کریں گے۔

ملاقات میں پاکستان انڈیا کشیدگی اور مسئلہ کشمیر سمیت خطے کی موجودہ صورتحال پر بات چیت ہوگی۔ ملاقات میں اسرائیل ایران کے درمیان جاری کشیدگی پر بھی بات چیت کا امکان ہے۔ امریکی صدر ڈونلڈ ٹرمپ نے افواج پاکستان کے فیلڈ مارشل سید عاصم منیر کے اعزاز میں ظہرانہ دیا ہے، سید عاصم منیر پاکستان کی تاریخ کے پہلے پاک فوج کے سربراہ ہیں جن سے امریکی صدر غیر سویلین قیادت ملاقات کررہے ہیں۔

(جاری ہے)

یہ ملاقات ایسے وقت میں ہورہی ہے جب ایران اسرائیل جنگ جاری ہے جبکہ پاکستان نے انڈیا سے معرکہ حق کے ذریعے جنگ جیتی ہوئی ہے۔ پاکستان اور انڈیا کے درمیان صدر ٹرمپ نے سیزفائر کروانے میں خصوصی کردار ادا کیا تھا۔ جبکہ صدر ٹرمپ نے اعلان کیا تھا کہ مسئلہ کشمیر کو بھی حل کروائیں گے۔ آج فیلڈ مارشل سید عاصم منیراور امریکی صدر ڈونلڈ ٹرمپ کے درمیان ملاقات میں مسئلہ کشمیر پرخصوصی بات چیت ہوگی ۔

دوسری جانب امریکی صدر ڈونلڈ ٹرمپ نے میڈیا سے گفتگو کرتے ہوئے ایک بار پھر پاکستان کو پسندیدہ اور اہم ایٹمی ملک قرار دیا ہے۔ امریکی صدر نے کہا کہ میں نے پاکستان اور بھارت کی نیوکلیئر جنگ رکوائی، پاکستان ایک اہم ایٹمی طاقت ہے، میں اس کو پسند کرتا ہوں، پاکستان کے لوگ بھی بہت اچھے ہیں۔ دوسری جانب آئی ایس پی آر کے مطابق امریکا کے سرکاری دورے کے موقع پر واشنگٹن ڈی سی میں پاک فوج کے سربراہ فیلڈ مارشل سید عاصم منیر نے اوورسیز پاکستانی کمیونٹی سے بات چیت کی، آرمی چیف فیلڈ مارشل سید عاصم منیر سے ملاقات کے لیے بڑی تعداد میں جمع ہونے والے سمندر پار پاکستانیوں نے آرمی چیف کا پرتپاک استقبال کیا۔

پاکستانی تارکین وطن نے آپریشن بنیان مرصوص اور معرکہ حق کے دوران مسلح افواج کی شاندار کارکردگی، بہادری اور پیشہ ورانہ مہارتوں کو سراہا۔اس موقع پر آرمی چیف فیلڈ مارشل سید عاصم منیر نے بیرون ملک مقیم پاکستانیوں کو پاکستان کے سفیر قرار دیتے ہوئے ان کے اہم اور موثر کردار کی تعریف کی، انہوں نے ترسیلات زر، سرمایہ کاری اور دیگر شعبوں میں کامیابیوں سمیت اور پاکستان کی معیشت میں ان کے فعال کردار کا اعتراف کیا۔

آرمی چیف فیلڈ مارشل سید عاصم منیر نے اوور سیز پاکستانیوں سے اظہار خیال کرتے ہوئے کہا کہ ملکی معیشت میں بیرون ملک پاکستانیوں کا نمایاں کردار ہے، سمندر پار پاکستانیوں نے آرمی چیف کے ساتھ اپنے تجربات اور تجاویز شیئر کیں۔ انہوں نے مشترکہ چیلنجز سے نمٹنے اور تعاون کو فروغ دینے کیلئے مسلسل تعاون کی ضرورت کو اجاگر کرتے ہوئے سمندر پار پاکستانیوں کے ساتھ روابط کی اہمیت پر بھی زور دیا۔آرمی چیف فیلڈ مارشل سید عاصم منیر نے ایک محفوظ، خوشحال اور ترقی کرتے ہوئے پاکستان کے لیے مل کر کام کرنے کا عہد کیا۔