Live Updates

فیلڈ مارشل سیدعاصم منیر نے پاک بھارت جنگ روکنے میں اہم کردار ادا کیا، ڈونلڈٹرمپ

جمعرات 19 جون 2025 00:40

واشنگٹن (اُردو پوائنٹ اخبارتازہ ترین - اے پی پی۔ 19 جون2025ء) امریکی صدر ڈونلڈ ٹرمپ نے کہا ہے کہ پاکستان کے آرمی چیف فیلڈ مارشل عاصم منیر نے گزشتہ ماہ پاک بھارت جنگ کو روکنے میں اہم کردار ادا کیا۔ ٹرمپ کا یہ بیان بدھ کی سہ پہر وائٹ ہائوس میں فیلڈمارشل سیدعاصم منیر کیلئے ظہرانے کی میٹنگ سے پہلے سامنے آیا ہے۔ امریکی صدر نے کہا کہ پاک بھارت جنگ روکنے میں سیدعاصم منیر نے مثبت کردار ادا کیا۔

ٹرمپ نے مزید کہا کہ پاکستان اور بھارت دونوں ایٹمی ملک ہیں، دونوں ممالک کے درمیان جنگ خطے میں بڑی تباہی کا سبب بن سکتی تھی۔

(جاری ہے)

انہوں نے کہا کہ میں نے دو بڑی قوموں کے درمیان جنگ روکوادی۔امریکی صدر جنہوں نے منگل کو بھارتی وزیر اعظم نریندر مودی کے ساتھ ٹیلی فونک گفتگو کی تھی، نے اپنے بیان کا اعادہ کیا کہ انہوں نے جنوبی ایشیا کی دو بڑی طاقتوں کے درمیان جنگ کو روک دیا۔

ٹرمپ نے نئی دہلی کے اس دعوے کے باوجود کہ اس نے واشنگٹن کی مداخلت کے بغیر پاکستان کے ساتھ براہ راست جنگ بندی پر کام کیا، اس کے باوجود بھارت اور پاکستان کے درمیان معاہدے میں ثالثی میں اپنے کردار کی نشاندہی کی اور کہا کہ میں نے بھارت اور پاکستان کے درمیان جنگ روک دی ہے، ٹرمپ نے کہا کہ میں پاکستان سے پیار کرتا ہوں۔