Live Updates

پاکستان سولر سے 25 فیصد بجلی بنانے والا آبادی کے لحاظ سے دنیا کا پہلا بڑا ملک بن گیا

رواں برس جنوری تا اپریل 25ء کے چار مہینوں میں پاکستان میں سب سے زیادہ بجلی سولر پینلوں سے ہی بنائی گئی

ساجد علی جمعرات 19 جون 2025 11:00

پاکستان سولر سے 25 فیصد بجلی بنانے والا آبادی کے لحاظ سے دنیا کا پہلا ..

اسلام آباد ( اُردو پوائنٹ اخبارتازہ ترین۔ 19 جون 2025ء ) پاکستان سولر پینلز سے 25 فیصد بجلی بنانے والا دنیا کا پہلا بڑا ملک بن گیا۔ غیر ملکی خبر رساں ادارے رائٹرز کے مطابق پاکستان آبادی کے لحاظ سے بڑے ممالک میں دنیا کا پہلا ملک بن چکا ہے جہاں کل بجلی میں 25 فیصد سے زیادہ سولر پینلز سے پیدا کی جارہی ہے، پاکستان میں سولر پینلز کے اس تیز ترین پھیلاؤ سے نہایت اہم شعبہ توانائی کے بین الاقوامی ماہرین بھی حیرت کا شکار ہیں۔

بتایا گیا ہے کہ جنوری تا اپریل 25ء کے چار مہینوں میں پاکستان میں سب سے زیادہ بجلی سولر پینلوں سے ہی بنائی گئی، 2202ء میں پاکستان نے 3 ہزار 500 میگاواٹ بجلی بنانے والے سولر پینل چین اور دیگر ممالک سے درآمد کیے، 2024 ء میں 16 ہزار 600 میگاوٹ بجلی بناتے پینل امپورٹ کیے گئے اور رواں سال کے صرف چار مہینوں میں ہی 10 ہزار میگاواٹ بجلی بنانے والے پینل درآمد کیے گئے۔

(جاری ہے)

رپورٹ میں کہا گیا ہے کہ پاکستان میں شمسی توانائی فروغ پا رہی ہے جو فوسل فیولز کی نسبت آلودگی نہ پیدا کرتی بجلی بناتی ہے ، فی الوقت یورپی ملک لکسمبرگ اپنی 46 فیصد بجلی سولر پینلوں سے بنا رہا، اس کے بعد لیتھونیا 43.6 فیصد، اسٹونیا 41.9 فیصد، ہنگری 37.5 فیصد اور ہالینڈ 37 فیصد بجلی سولر سے بنانے والا ملک ہے جب کہ اس وقت دنیا میں صرف 20 ملک سولر پینلز سے 25 فیصد بجلی بناتے ہیں اور ان ممالک میں پاکستان سب سے بڑا ملک ہے۔

دوسری طرف حکومت نے سولرپینل پر تجویز کردہ 18 فیصد ٹیکس کو کم کرتے ہوئے 10 فیصد پر لانے کا فیصلہ کیا ہے، قومی اسمبلی اجلاس میں خطاب کرتے ہوئے نائب وزیراعظم و وزیر خارجہ اسحاق ڈار نے بجٹ معاملات پر تفصیلی بیان دیتے ہوئے اتحادی جماعتوں خصوصاً پیپلز پارٹی کے تحفظات دور کرنے کا اعلان کیا اور بتایا کہ سولرسسٹم کیلئے 46 فیصد مال درآمد کیا جاتا ہے، سولرپینل پر 18 فیصد ٹیکس کو 10 فیصد پر لانے کا فیصلہ ہوا ہے، سولر پینلز پر افہام و تفہیم سے اب ٹیکس کی شرح کم کرکے 10 فیصد کر دی گئی ہے، یہ تمام فیصلے اتحادی جماعتوں اور سٹیک ہولڈرز سے مشاورت کے بعد اتفاق رائے سے کیے گئے ہیں۔