اچانک ایران اسرائیل جنگ بندی کیسے ہوئی؟ کس نے بنیادی کردار ادا کیا؟ تفصیلات سامنے آگئیں

ایران نے خطے میں امریکی فوجی اڈوں کو نشانہ بنایا تو امریکہ کی جانب سے جنگ بندی کی تجویز ایران تک پہنچانے کے لیے رابطہ کیا گیا؛ امریکی میڈیا کا دعویٰ

ساجد علی منگل 24 جون 2025 11:18

اچانک ایران اسرائیل جنگ بندی کیسے ہوئی؟ کس نے بنیادی کردار ادا کیا؟ ..

واشنگٹن ( اُردو پوائنٹ اخبارتازہ ترین۔ 24 جون 2025ء ) ایران اور اسرائیل کے درمیان جنگ بندی کیسے ہوئی؟ اور کس نے اس حوالے سے بنیادی کردار ادا کیا؟ اس سلسلے میں تفصیلات سامنے آگئیں۔ امریکی میڈیا کی جانب سے انکشاف کیا گیا ہے کہ ایران اور اسرائیل کے درمیان ممکنہ جنگ بندی کے معاہدے میں قطر نے اہم سفارتی کردار ادا کیا، قطری وزیر اعظم شیخ محمد بن عبدالرحمن آل ثانی نے اس معاہدے کو طے کروانے میں براہ راست مداخلت کی۔

اس ضمن میں مزید معلوم ہوا ہے کہ ایران نے خطے میں امریکی فوجی اڈوں کو نشانہ بنایا تو امریکہ کی جانب سے جنگ بندی کی تجویز ایران تک پہنچانے کے لیے قطری حکام سے رابطہ کیا گیا، جس پر قطر نے ثالثی کا کردار ادا کرنے پر رضامندی ظاہر کی اور اس مقصد کے لیے قطری وزیراعظم نے ایرانی حکام سے ٹیلیفونک رابطہ کیا۔

(جاری ہے)

بتایا گیا ہے کہ اسرائیل اور ایران نے جنگ بندی کا آغاز کردیا ہے، پاکستان وقت کے مطابق ایران نے صبح 9 بجے سے جنگ بندی پر عملدرآمد شروع کیا گیا، اس حوالے سے ایرانی سرکاری میڈیا کا کہنا ہے کہ دشمن پر جنگ بندی نافذ کر دی گئی ہے، جنگ بندی امریکی جارحیت کے جواب میں فوجی ردعمل کے بعد کی گئی، امریکی جارحیت کے جواب میں کامیاب میزائل آپریشن کے بعد جنگ بندی کی، پاسداران انقلاب کے کامیاب میزائل آپریشن اور سرزمین کے دفاع میں شہریوں کی مثالی ثابت قدمی اور اتحاد کے باعث دشمن پر جنگ بندی نافذ کی گئی ہے۔

امریکی نشیریاتی ادارے سی این این نے بتایا کہ ایران اور اسرائیل کے درمیان سیز فائر کا نفاذ ہوچکا ہے جس کے بعد اسرائیل نے اپنی فضائی حدود بھی کھول دی ہے تاہم دونوں ممالک کی جانب سے ابھی تک سرکاری سطح پر جنگ بندی کے نفاذ کا باقاعدہ اعلان نہیں کیا گیا، سرکاری طور پر جنگ بندی کی تفصیلات سے تاحال آگاہ نہیں کیا گیا اور جنگ بندی کے وقت سے متعلق بھی کوئی سرکاری مؤقف سامنے نہیں آیا، تاہم امریکی صدر ڈونلڈ ٹرمپ نے اپنے ایک بیان میں کہا ہے کہ جنگ بندی کا آغاز ہوگیا ہے برائے مہربانی جنگ بندی کی خلاف ورزی نہ کریں۔