سی ٹی ڈی کا "آپریشن یلغار" ،را کے 6 سہولت کار گرفتار،دھماکہ خیز مواد،و خفیہ نقشے برآمد

بدھ 25 جون 2025 17:49

لاہور (اُردو پوائنٹ اخبارتازہ ترین - اے پی پی۔ 25 جون2025ء) کائونٹر ٹیررازم ڈیپارٹمنٹ (سی ٹی ڈی) پنجاب نے کارروائی کرتے ہوئے بھارتی خفیہ ایجنسی ’’را‘‘ کا حمایت یافتہ دہشت گرد نیٹ ورک بے نقاب کر دیا۔ ترجمان کے مطابق سی ٹی ڈی نے "آپریشن یلغار" کے تحت پنجاب کے مختلف اضلاع میں کارروائیاں کرتے ہوئے "را" کے 6 سہولت کاروں کو گرفتار کر لیا ہے۔ سی ٹی ڈی نے ٹوبہ ٹیک سنگھ سے بھاری مقدار میں دھماکہ خیز مواد، ڈیٹونیٹرز اور خفیہ نقشے برآمد کیے ہیں جبکہ بہاولپور میں دبئی سے فنڈنگ حاصل کرنے والے ’’را‘‘ کے ایک سہولت کار کو بھی رنگے ہاتھوں گرفتار کیا گیا۔

ترجمان کے مطابق بہاولنگر سے تعلق رکھنے والے دو ایسے افراد بھی گرفتار کیے گئے ہیں جو بھارتی بارڈر سکیورٹی فورس ( بی ایس ایف ) سے براہ راست آئی ای ڈیز حاصل کر چکے تھے۔

(جاری ہے)

تحقیقات کے دوران سی ٹی ڈی کو بہاولپور کی ایک مسجد اورریلوے سٹیشن پر دہشت گرد حملے کی منصوبہ بندی کا انکشاف ہوا ہے۔ مزید برآں سی ٹی ڈی نے بھارتی افسران میجر رویندراراٹھور اور انسپکٹر سنگھ کی آڈیوز انٹرسیپٹس بھی حاصل کر لی ہیں، جن میں پاکستان میں ٹارگٹ کلنگ اور حساس مقامات پر حملوں کے احکامات دیئے گئے تھے ،دہشت گردوں کے قبضے سے آئی ای ڈیز ، حفاظتی فیوز اور خفیہ دستاویزات بھی برآمد کی گئی ہیں۔

سی ٹی ڈی پنجاب نے واضح کیا ہے کہ پاکستان کی سلامتی کے خلاف کسی بھی سازش کو ہر صورت ناکام بنایا جائے گا اور ملک دشمن عناصر کے خلاف کارروائیاں مزید تیز کی جائیں گی۔