Live Updates

میں ایم آئی کی ایجنٹ ہوں اس لیے کل پورا دن قبرستان میں کھڑا کر دیا تھا؟

علی امین گنڈاپور ثابت کرے میں کس وی لاگر کو کنٹرول کرتی ہوں؟ علیمہ خان کا الزامات پر ردعمل

ساجد علی بدھ 1 اکتوبر 2025 13:01

میں ایم آئی کی ایجنٹ ہوں اس لیے کل پورا دن قبرستان میں کھڑا کر دیا تھا؟

راولپنڈی ( اُردو پوائنٹ اخبارتازہ ترین۔ 01 اکتوبر2025ء ) پاکستان تحریک انصاف کے پیٹرن انچیف عمران خان کی ہمشیرہ علیمہ خان نے وزیراعلیٰ خیبرپختونخواہ علی امین گنڈاپور کے الزامات پر ردعمل دے دیا۔ تفصیلات کے مطابق سابق وزیراعظم عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی سماعت کے لیے عمران خان کی بہنیں علیمہ خان، نورین خان اور عظمیٰ خان اڈیالہ جیل پہنچیں، اس موقع پر راولپنڈی کی اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ میں نے علی امین گنڈاپور کا ویڈیو بیان نہیں سنا لیکن اگر میں ایم آئی کی ایجنٹ ہوں تو کیا اس لیے کل مجھے پورا دن قبرستان میں کھڑا کر دیا گیا تھا؟ گنڈا پور ثابت کرے میں کس وی لاگر کو کنٹرول کرتی یا فیڈ کرتی ہوں؟۔

قبل ازیں اپنے ایک بیان میں وزیراعلیٰ خیبرپختونخواہ علی امین گنڈاپور نے الزام عائد کیا تھا کہ علیمہ خان کا تمام وی لاگرز سے رابطہ ہے، میرے خلاف مہم چل رہی ہے، عمران خان کو معلوم ہے ان کی بہن کی بدولت پارٹی میں اختلافی تکرار ہورہی ہے، میں بانی پی ٹی آئی کا وفادار ہوں، شکایت کمزور اور منافق لوگ کرتے ہیں، صوبے میں وزارتیں لینا اور تبدیل کرنا سب کچھ عمران خان کی مشاورت سے ہورہا ہے، 7 ماہ پہلے ان وزراء کی کارکردگی سے اسد قیصر کو آگاہ کیا تھا۔

(جاری ہے)

ان کا یہ بھی کہنا تھا کہ پارٹی میں بہت بڑی تقسیم آچکی ہے، مائنس بانی مہم اور پارٹی تقسیم میں علیمہ خان کا بنیادی کردار ہے، اسی وجہ سے پارٹی میں مایوسی پھیل رہی ہے لیکن عمران خان کومائنس کرنے کی کسی میں ہمت نہیں، کچھ وی لاگرز ٹارگٹ کرکے پارٹی میں تقسیم پیدا کر رہے ہیں، وی لاگرز سے علیمہ خان کا رابطہ ہے اور وہ انہیں منع کرنے کی بجائے شہ دے رہی ہیں، علیمہ خان کے بیٹے پر جب گرفتاری کی بات آئی تو 3 دن بعد رہا ہو گیا، بانی کو بتایا ان کی رہائی کیلئے کوششیں نہیں بلکہ گروپ بندیاں ہو رہی ہیں، پارٹی میں ہر شخص گروپ بندیوں کا سہارا لے کر ذاتی مفادات حاصل کر رہا ہے، عمران خان کو بتانا فرض تھا، پرواہ نہیں کہ بانی پی ٹی آئی کی فیملی ہے کیوں کہ مجھے کرسی اور نہ ہی عہدے کی پرواہ ہے۔