ایران اسرائیل جنگ بندی خوش آئند ہے، برادر اسلامی ملک نے صدر زرداری، میرا اور فیلڈ مارشل کا نام لے کر شکریہ ادا کیا،وزیراعظم شہباز شریف

اسلام آباد(اردوپوائنٹ اخبار تازہ ترین۔26جون 2025)وزیراعظم شہباز شریف نے کہا ہے کہ ایران اسرائیل جنگ بندی خوش آئند پاکستان نے برادر اسلامی ملک کی حمایت،ایران نے صدر زرداری، میرا اور فیلڈ مارشل کا نام لے کر شکریہ ادا کیا، ایران نے اپنے دفاع میں اسرائیل کو بھرپور جواب دیا، ایرانی قوم نے بڑی جرات اور بہادری کا مظاہرہ کیا،وزیراعظم شہباز شریف کی زیر صدارت وفاقی کابینہ کا اجلاس منعقد ہوا۔

اجلاس میں وفاقی کابینہ کو قومی سلامتی کمیٹی اجلاس کے فیصلوں پر اعتماد میں لیا گیا۔کابینہ اجلاس میں وزیراعظم اور فیلڈ مارشل کے کشیدگی کے دوران اور بعد میں زبردست کردار پر قرارداد کی منظوری بھی دی گئی۔ وفاقی کابینہ نے ایران اسرائیل کشیدگی میں کمی کے حوالے سے بھی اطمینان کا اظہار کیا۔

(جاری ہے)

اجلاس میں ملک کی مجموعی صورت حال کا جائزہ لیا گیا۔

وفاقی کابینہ کے اجلاس سے خطاب کرتے ہوئے وزیراعظم شہباز شریف کا کہنا تھا کہ پاکستان نے بھرپور اور مستقل انداز میں ایران کی حمایت کی۔ وزیراعظم نے ایران اور اسرائیل کے درمیان جنگ بندی کو خوش آئند قرار دیا اور بتایا کہ ایران نے اس عمل میں پاکستان کی سیاسی، عسکری اور عوامی حمایت پر شکریہ ادا کیا جس کی عالمی سطح پر بھی پذیرائی ہوئی۔

وزیراعظم نے کہا کہ آرمی چیف فیلڈ مارشل عاصم منیر نے استنبول میں ایرانی وزیر خارجہ سے جو اہم ملاقات کی اس سے دونوں ممالک کے تعلقات مزید مضبوط ہوئے۔وزیراعظم نے بجٹ کی منظوری پر وزیر خزانہ اور پوری ٹیم کا شکریہ ادا کیا۔وزیراعظم شہباز شریف نے وفاقی کابینہ سے خطاب کرتے ہوئے کہا کہ مالی سال 2025-26 کے بجٹ کی تیاری اور منظوری ایک بڑی قومی کامیابی ہے جس پر وزیر خزانہ اور ان کی ٹیم خراج تحسین کی مستحق ہے۔

وزیراعظم نے حکومتی اور اتحادی جماعتوں کے ارکان، خصوصاً نائب وزیراعظم اورحلیف جماعتوں کی بجٹ میں کاوشیں قابل ستائش ہیں اس حوالے سے صدر مملکت آصف زرداری اور بلاول بھٹو کا بھی شکرگزار ہوں۔انہوں نے کہا کہ پیپلز پارٹی کی قیادت کو بھی بجٹ منظوری کے عمل میں سنجیدہ اور مثبت کردار پر سراہا۔وفاقی کابینہ نے پیٹرولیم لیوی متعین کرنے کا اختیار پیٹرولیم ڈویژن کو دینے کی منظوری دے دی۔

وزیر اعظم نے  فیلڈ مارشل عاصم منیر کی قائدانہ صلاحیتوں کی تعریف کرتے ہوئے کہا کہ نہ صرف پاکستان بلکہ امریکی صدر نے بھی ان کے کردار کو سراہا ہے۔ ان کاکہناتھاکہ پاک فوج ملک میں امن کے دشمنوں ’فتنۃ الخوارج‘ کے خلاف بھرپور کارروائیاں کر رہی ہے جو کہ ریاست کے استحکام کیلئے ناگزیر ہے۔ پاک فوج نے دشمن کو شکست فاش دی۔ پاک فوج فتنہ الخوارج کو کاری ضرب لگا رہی ہے۔

پاک فوج عظیم قربانیاں دے رہی ہے، ہم دشمن کے خلاف جنگ جیتیں گے۔محرم الحرام کی آمد کے پیش نظر وزیراعظم نے قوم سے اپیل کی کہ وہ مجالس اور جلوسوں میں امن، بھائی چارے اور مذہبی رواداری کا عملی مظاہرہ کریں تاکہ ملک میں فرقہ واریت کی کوئی گنجائش باقی نہ رہے۔وزیراعظم شہباز شریف نے مزید کہا کہ محرم الحرام کا آغاز ہونے جا رہا ہے، وفاق اور صوبوں میں امن و امان کیلئے مؤثر اقدامات کئے جائیں، مجالس اور جلوسوں میں امن اور بھائی چارے کا مظاہرہ کیا جائے۔