Live Updates

خطے میں کشیدگی کو کم کرنے کیلئے بین الاقوامی برادری اسرائیل پر مستقل جنگ بندی کیلئے دباؤ ڈالے، خواجہ آصف

شنگھائی تعاون تنظیم کے وزرائے دفاع کے اجلاس سے خطاب میں خواجہ آصف کی ایران کے خلاف حالیہ اسرائیلی فوجی جارحیت کی شدید مذمت اور خطے میں کشیدگی کو کم کرنے کیلئے تحمل، مذاکرات اور سفارت کاری پر زور

فیصل علوی جمعرات 26 جون 2025 17:00

بیجنگ(اردوپوائنٹ اخبار تازہ ترین۔26جون 2025)وزیردفاع خواجہ آصف کا کہنا ہے کہ خطے میں کشیدگی کو کم کرنے کیلئے بین الاقوامی برادری اسرائیل پر مستقل جنگ بندی کیلئے دباؤ ڈالے،خواجہ آصف کی ایران کے خلاف حالیہ اسرائیلی فوجی جارحیت کی شدید مذمت اور خطے میں کشیدگی کو کم کرنے کیلئے تحمل، مذاکرات اور سفارت کاری پر زور دیا،شنگھائی تعاون تنظیم کے وزرائے دفاع کے اجلاس سے خطاب کرتے ہوئے کہاوزیر دفاع کہا ہے کہ دہشت گردی پوری دنیا کیلئے مشترکہ خطرہ ہے اسے سیاسی مقاصد کیلئے استعمال نہ کیا جائے۔

اس موقع پر وزیر دفاع خواجہ آصف نے علاقائی امن، سلامتی اور کثیر الجہتی تعاون کیلئے پاکستان کے مضبوط عزم کا اعادہ کیا۔خواجہ آصف نے عالمی اور علاقائی سلامتی کے چیلنجوں سے نمٹنے کیلئے اجتماعی کوششوں کی اہمیت پر زور دیا۔

(جاری ہے)

انہوں نے کہا کہ عالمی برادری دیرینہ تنازعات خصوصاً مسئلہ کشمیر اور فلسطین کا پرامن حل یقینی بنائے کیونکہ یہ عالمی امن و سلامتی کیلئے مستقل خطرہ بنے ہوئے ہیں۔

وزیر دفاع خواجہ آصف نے پہلگام حملے سمیت ہر دہشت گرد کارروائی کی مذمت کی اور کہا کہ دہشت گردی کے خلاف کوششوں کو سیاست کی بھینٹ نہ چڑھایا جائے اور نہ ہی کسی ملک کو اپنی اندرونی ناکامیوں سے توجہ ہٹانے کیلئے اس کو استعمال کرنے دیا جائے۔ پاکستان ہر قسم کی دہشت گردی کی شدید مذمت کرتا ہے، جعفرایکسپریس حملوں کے منصوبہ سازوں، مالی معاونین،سرپرستوں کو کٹہرے میں لایا جائے۔

خطے کی پائیدار خوشحالی کے مشترکہ وژن کے حصول کیلئے پرامن اور مستحکم افغانستان ضروری ہے۔پاکستان کا ایس سی او میں فعال کردار علاقائی استحکام اورمشترکہ تعاون کے فروغ میں اہم ستون ہے۔ ایس سی او خطے میں امن و استحکام کا ایک اہم ستون ہے اور پاکستان اس کے اصولوں سے غیر متزلزل وابستگی رکھتا ہے۔تمام ریاستوں کو چاہیے کہ وہ اس حساس معاملے کو سیاسی مفادات کیلئے استعمال نہ کریں۔

پاکستان اقوام متحدہ کے منشور، ایس سی او چارٹر اور بین الاقوامی قوانین کی مکمل پاسداری کرتا ہے۔ افغانستان میں پائیدار امن اوراستحکام کو علاقائی خوشحالی اورایس سی او ویژن کیلئے ناگزیر ہے۔وزیر دفاع نے کہا کہ دہشت گردی ایک مشترکہ خطرہ ہے۔ پاکستان دہشت گردی کی تمام شکلوں اور مظاہر کی مذمت کرتا ہے۔