Live Updates

چیف آف نیول سٹاف کا پی اے ایف ایئر وار کالج انسٹیٹیوٹ کراچی کا دورہ

ایڈمرل نوید اشرف نے تزویراتی اہداف کے حصول کیلئے سروسز کے درمیان تعاون ناگزیر قرار دے دیا آپریشنل تیاری جدید جنگ میں کامیابی کی بنیاد ہے،پاک فضائیہ کیساتھ زیادہ کثرت ،مربوط مشترکہ آپریشنل مشقوں شروع کی جائینگی، شرکاء سے خطاب

پیر 30 جون 2025 20:25

راولپنڈی (اُردو پوائنٹ اخبارتازہ ترین - این این آئی۔ 30 جون2025ء) چیف آف نیول سٹاف ایڈمرل نوید اشرف نے تزویراتی اہداف کے حصول کیلئے سروسز کے درمیان تعاون ناگزیر قرار دیتے ہوئے کہا ہے کہ آپریشنل تیاری جدید جنگ میں کامیابی کی بنیاد ہے،پاک فضائیہ کیساتھ زیادہ کثرت ،مربوط مشترکہ آپریشنل مشقوں شروع کی جائینگی۔آئی ایس پی آر سے جاری بیان کے مطابق چیف آف نیول سٹاف ایڈمرل نوید اشرف نے پی اے ایف ایئر وار کالج انسٹیٹیوٹ کراچی کا دورہ کیا۔

ایئر وار کالج آمد پر کالج کے صدر ایئر وائس مارشل راشد حبیب نے استقبال کیا، مہمانِ خصوصی نے ادارے میں فراہم کی جانے والی علمی و پیشہ ورانہ اعلی تعلیم کو سراہا۔چیف آف نیول سٹاف ایڈمرل نوید اشرف نے مستقبل کی عسکری قیادت کی تربیت میں اس کے اہم کردار کو تسلیم کیا۔

(جاری ہے)

نیول چیف نے ایئر وار کورس کے شرکاء سے خطاب کرتے ہوئے کہا کہ آپریشنل تیاری جدید جنگ میں کامیابی کی بنیاد ہے۔

نیول چیف نے ایئر چیف مارشل ظہیر احمد بابر سدھو کی قیادت کو سراہتے ہوئے کہا کہ فضائیہ کی آپریشنل تیاری سے خطے میں دفاعی توازن کا منظرنامہ تبدیل ہوا۔نیول چیف نے کہا کہ پاکستان نیوی کی جنگی صلاحیتوں میں سطحِ آب، زیرِ آب اور فضائی تمام شعبوں میں خاطر خواہ اضافہ ہوا، پاک نیوی زیادہ متحرک اور موثر بحری قوت کے طور پر ابھری ہے۔ انہوں نے کہا کہ تزویراتی اہداف کے حصول کے لیے سروسز کے درمیان تعاون ناگزیر ہے، نیول چیف نے پاک فضائیہ کے ساتھ زیادہ کثرت سے اور مربوط مشترکہ آپریشنل مشقوں کے آغاز کا اعلان کیا۔

انہوں نے کہا کہ جدید جنگوں میں تکنیکی جدت کلیدی کردار ادا کر رہی ہے، نیشنل ایرو سپیس سائنس اینڈ ٹیکنالوجی پارک اور پاکستان میری ٹائم سائنس اینڈ ٹیکنالوجی پارک کے درمیان مجوزہ سٹریٹجک اشتراک مقامی سطح پر بغیر پائلٹ نظاموں کی تیاری کو فروغ دے گی۔نیول چیف نے کہا کہ اس سے پاکستان کی تکنیکی خودانحصاری اور دفاعی شعبے میں عملی برتری کو تقویت ملے گی۔