منعم ظفر خان کا وزیر اعظم کو خط ،K-4کے لیے 40ارب روپے مختص کرنے کا مطالبہ

کراچی(اُردو پوائنٹ اخبارتازہ ترین - این این آئی۔ 01 جولائی2025ء)امیر جماعت اسلامی کراچی منعم ظفر خان نے شہر میں پانی کے سنگین بحران اور K-4منصوبے کے حوالے سے وزیر اعظم شہباز شریف کو خط ارسال کیا ہے اور مطالبہ کیا ہے کہ K-4منصوبے کے لیے وفاقی بجٹ میں رکھی گئی رقم میں فوری طور پر اضافہ اور مطلوبہ 40ارب روپے مختص کیے جائیں ، کراچی جو ملک کا سب سے زیادہ ٹیکس دینے والا شہر ہے ، وفاقی بجٹ اور ترقیاتی پروگرام میں اس کا جائز حصہ دیا جائے ، وفاقی بجٹ میں K-4جیسے اہم ترین منصوبے کے لیے فقط 3ارب 20کروڑ روپے رکھے گئے ہیں جبکہ ضرورت کم از کم 40ارب روپے کی ہے‘ جس کا واضح مطلب یہی ہے کہ منصوبہ ختم کر دیا جائے جو ساڑھے تین کروڑ آبادی والے شہر کے ساتھ زیادتی ہے ۔

منعم ظفر خان نے اپنے خط میں وزیر اعظم شہباز شریف کو مخاطب کرتے ہوئے کہا کہ آپ جانتے ہیں کہ کراچی پاکستان کی اقتصادی شہ رگ ہے ، منعم ظفر خان نے شہباز شریف کو ان کی 30اگست 2021کے دورہ کراچی کے دوران بانی ِ پاکستان قائد اعظم محمد علی جناح ؒ کے مزار پر حاضری کے موقع پر کیا گیا وعدہ اورا علان یاد دلایا جس میں شہباز شریف نے کہا تھا کہ ان کو’’اگر موقع ملا تو وہ کراچی کوپیرس‘‘ بنا دیں گے ، منعم ظفر خان نے کہا کہ قسمت نے آپ کو یہ موقع فراہم کر دیا اور آپ ملک کے وزیر اعظم بن گئے ، سردست آپ کی توجہ کراچی میں جاری پانی کے سنگین بحران اور K-4منصوبے کی طرف مبذول کرانا ہے ،ساڑھے تین کروڑ آبادی والے شہر کو روزانہ کم از کم 1200ملین گیلن پانی در کار ہے مگر شہر کو صرف اس کی ضرورت کا نصف یعنی کم و بیش 650ملین گیلن پانی ملتا ہے ، شہر کو پانی کی فراہمی کا آخری منصوبہ K-3سابق سٹی ناظم سٹی ڈسٹرکٹ گورنمنٹ کراچی‘ نعمت اللہ خان ایڈوکیٹ کے دور میں مکمل ہوا تھا ، اسی دور (2003) میں K-4منصوبے کا PC-IIبھی منظور کر لیا گیا تھا ۔

(جاری ہے)

K-4منصوبہ کافی عرصہ تعطل کا شکار رہا مگر گزشتہ دو سال اس منصوبے میں تیزی دیکھنے میں آئی اور اُمید ہو چلی تھی کہ آئندہ سال یعنی 2026کے وسط تک روزانہ 260ملین گیلن پانی کی فراہمی کے اس منصوبے کا فیز 1مکمل ہو جائے گا ‘ جو پہلے ہی 650ملین گیلن سے کم کر دیا گیا ہے مگر شومئی قسمت وفاقی بجٹ میں مطلوبہ 40ارب روپے مختص کرنے کے بجائے صرف 3.2ارب روپے رکھے گئے ۔