5 بین الاقوامی جنگیں رکوا کر دنیا میں امن قائم کرنے میں کلیدی کردار ادا کیا، ٹرمپ نے خود کونوبیل انعام کیلئے بہترین امیدوار قراردیدیا

واشنگٹن(اردوپوائنٹ اخبار تازہ ترین۔04جولائی 2025)امریکی صدر ڈونلڈٹرمپ نے دعویٰ کیا کہ انہوں نے پانچ بین الاقوامی جنگیں رکوا کر دنیا میں امن قائم کرنے میں کلیدی کردار ادا کیااور اسی بنیاد پر میں نوبل امن انعام کیلئے بہترین امیدوار ہوں،امریکی صدر ڈونلڈ ٹرمپ نے خود کو نوبیل انعام کا بہترین امیدوار قرار دیدیا، ڈونلڈ ٹرمپ کا اگلی صدارتی مدت کیلئے قانون میں تبدیلی کا بھی عندیہ دیتے ہوئے مزید 4سال کیلئے صدر بننے کا ارادہ بھی ظاہر کردیا۔

ڈونلڈ ٹرمپ نے ملک کے 250 ویں یومِ آزادی کے موقع پر آئیووا اسٹیٹ فیئر گراؤنڈز میں ایک بھرپور عوامی اجتماع سے خطاب کرتے ہوئے داخلی اور خارجی پالیسیوں پر اہم اعلانات کئے۔امریکی صدر نے کہا کہ پاکستان اور بھارت کے پاس ایٹمی ہتھیار ہیں۔

(جاری ہے)

ایٹمی جنگ ہونے سے پہلے پاکستان اور بھارت میں سیزفائر کرایا،کانگو اور روانڈا، کوسوو اور سربیا کو لڑنے سے روکا۔

کانگو اور روانڈا کے درمیان گزشتہ 30 سال سے خانہ جنگی جاری تھی جس میں 60 لاکھ افراد ہلاک ہوئے ہم نے اسے ختم کرایا۔صدر ٹرمپ نے خود کو نوبیل انعام کا بہترین امیدوار قرار دیتے ہوئے کہا کہ نوبیل انعام کسی ایسے اسکول پروفیسر کو مل جائے گا جس کو لوگ جانتے بھی نہیں ہوں گے۔خطاب کے دوران صدر ٹرمپ نے امریکی کسانوں کے مسائل کا ذکر کرتے ہوئے کہا کہ وہ ان کسانوں کی مدد کرنا چاہتے ہیں جو اپنے فارموں پر موسمی مائیگرنٹ مزدوروں پر انحصار کرتے ہیں۔

انہوں نے عندیہ دیا کہ اگر کسان ان مزدوروں کی ضمانت دیں، تو انہیں ملک میں رہنے دیا جائے گا۔امریکی صدر نے یہ دعویٰ بھی دہرایا کہ امریکی طیاروں نے 37 گھنٹے پرواز کرکے ایرانی جوہری تنصیبات کو نشانہ بنایا اور انہیں صفحہ ہستی سے مٹادیا ہے۔صدر ٹرمپ نے واضح کیا کہ امریکی تاریخ کا سب سے بڑا ڈیپورٹیشن پروگرام شروع کردیا ہے، امریکا میں غیر قانونی طور پر داخلہ مکمل طور پر بند کردیں گے۔

انہوں نے دعویٰ کیا کہ گزشتہ ماہ کوئی بھی شخص غیرقانونی طریقے سے امریکہ میں داخل نہیں ہوا جبکہ بائیڈن دور میں لاکھوں جرائم پیشہ افراد غیرقانونی طور پر داخل ہوئے۔انہوں نے کہا کہ اگر میں لاس اینجلس میں نیشنل گارڈز نہ بھیجتا، تو وہاں سب کچھ راکھ کا ڈھیر بن جاتا۔ٹرمپ نے سابق حکومت پر تنقید کرتے ہوئے کہا کہ بائیڈن دور میں لاکھوں افراد غیر قانونی طور پر امریکہ میں داخل ہوئے، لیکن ان کی انتظامیہ اب اس رحجان کو روکنے کیلئے متحرک ہے۔

صدر ٹرمپ نے عالمی سطح پر اپنی پالیسیوں کا دفاع کرتے ہوئے کہا کہ پانچ عالمی تنازعات کو میں نے روکا اور ہم نے دنیا کو تباہی سے بچایا ہے اور دنیا کو یہ تسلیم کرنا ہوگا کہ ہم امن کے علمبردار ہیں۔بگ بیوٹی فل بل امریکا کو پھر سے عظیم بنائے گا۔ بل میں امریکی تاریخ میں سب سے زیادہ ٹیکس کٹ شامل ہے اور سوشل سیکیورٹی پر کوئی ٹیکس نہیں لگایا گیا۔صدر ٹرمپ نے یہ دعویٰ بھی کیا کہ میرے پچھلے دور میں معیشت بہتر تھی اب مزید مضبوط ہوگی۔