پاکستان ، آذربائیجان نے 2ارب ڈالر سرمایہ کاری کے معاہدے پر دستخط کردیئے

پاکستان میں سرمایہ کاری پرصدرالہام علیوف کے مشکور ،مزید اضافہ کریں گے،وزیراعظم کی میڈیاسے گفتگو

جمعہ 4 جولائی 2025 22:45

اسلام آباد(اُردو پوائنٹ اخبارتازہ ترین - این این آئی۔ 04 جولائی2025ء)وزیراعظم شہباز شریف نے کہا ہے کہ پاکستان اور آذربائیجان نی2ارب ڈالر سرمایہ کاری کے معاہدے پر دستخط کیے جس پر صدر الہام علیوف کے مشکور ہیں۔اعلامیے کے مطابق نائب وزیر اعظم و اسحاق ڈار اور آذربائیجان کے وزیر معیشت نے معاہدے پر دستخط کیے ہیں۔اعلامیے کے مطابق وزیر اعظم شہباز شریف کی موجودگی میں معاہدے پر دستخط کیے گئے۔

اعلامیے میں کہا گیا کہ معاہدے سے دونوں ممالک کے درمیان سرمایہ کاری اور تجارتی تعلقات تاریخی سطح پر پہنچ گئے، یہ معاہدہ دونوں ممالک کی تجارتی شراکت داری کی مزید مضبوطی کی ضمانت ثابت ہو گا، دونوں ممالک کے درمیان مختلف شعبوں میں تعاون کو فروغ دینے پر اتفاق کیا ہے۔وزیر اعظم شہباز شریف اور آذربائیجان کے صدر کی ملاقات کے بعد معاہدے پر دستخط ہوئے، حتمی و مفصل معاہدے پر آذربائیجان کے صدر کے دورہ پاکستان کے دوران دستخط کیے جائیں گے۔

(جاری ہے)

میڈیا سے گفتگو کرتے ہوئے وزیراعظم نے کہا کہ پاکستان اور آذربائیجان نی2ارب ڈالر سرمایہ کاری کے معاہدے پر دستخط کیے ہیں۔انہوں نے کہا کہ صدرالہام علیوف سے ملاقات نہایت بہترین اور نتیجہ خیز رہی، پاکستان میں سرمایہ کاری پرصدرالہام علیوف کے مشکور ہیں اور اس میں مزید اضافہ کریں گے۔شہباز شریف نے اقتصادی تعاون تنظیم کے سربراہی اجلاس کے کامیاب انعقاد پر صدر آذربائیجان الہام علیوف کو مبارکباد پیش کی۔