عالمی برادری کشمیریوں پر مظالم روکنے، قیدیوں کی رہائی اور مسئلہ کشمیر کے حل کے لیے اپنا کردار ادا کرے ، علی رضا سید

برسلز (اُردو پوائنٹ اخبارتازہ ترین - اے پی پی۔ 06 جولائی2025ء) کشمیرکونسل ای یو کے چیئرمین علی رضا سید نے عالمی برادری سے مطالبہ کیاہے کہ کشمیریوں پر مظالم بند کروائے، کشمیری قیدیوں کی رہائی کے لیے اقدامات کرے اور مسئلہ کشمیر کے منصفانہ حل کے لیے اپنا کردار ادا کرے۔کشمیرمیڈیاسروس کے مطابق علی رضا سید نے یوم عاشورہ کی مناسبت سے برسلز میں جاری ایک بیان میں کہا کہ نواسہ رسول حضرت امام حسین کی قربانی تمام آزادی پسندوں کے لیے مشعل راہ ہے۔

انہوں نے کہاکہ یومِ عاشورہ ہمیں حضرت امام حسین کی عظیم قربانی اور حق و انصاف کے لیے ڈٹ جانے کا درس دیتا ہے۔ آج کشمیری بھی اسی جذبے کے ساتھ بھارتی ظلم و جبر کے خلاف ڈٹے ہوئے ہیں۔ انہوں نے کہاکہ کشمیری عوام نے کربلا سے سیکھا ہے کہ حق کی راہ میں قربانیاں دینا پڑتی ہیں۔

(جاری ہے)

ابتک بڑی تعداد میں کشمیری اپنی جانوں کا نذرانہ پیش کرچکے ہیں، بڑی تعداد جبری طور پر لاپتہ اور قید ہے۔

علی رضا سید نے کہاکہ امام عالی مقامنے عظیم قربانی دے کرانسانی اقدارکی حفاظت کی ہے۔ واقعہ کربلا ہمیں انسانی اقدارکے تحفظ اور انسانی حقوق کا خیال رکھنے کا درس دیتاہے۔ کربلاظلم کے خلاف جدوجہدکانام اوردرس حریت ہے۔ علی رضا سید نے کہاکہ آج جموں وکشمیرکے عوام کربلاکے عظیم پیغام سے متاثرہوکراپنے وطن کی آزادی کے لیے جدوجہد کررہے ہیں جس پر بھارتی فوج قابض ہے۔

انہوں نے کہاکہ مقبوضہ جموں و کشمیر کے مظلوم عوام نے جو طویل مدت سے بھارتی محاصرے، تشدد، ظلم وستم اور گرفتاریوں کا سامنا کررہے ہیں، کربلا کے عظیم سانحہ سے درس حاصل کیا ہے۔انہوں نے کہاکہ جموں و کشمیر کے ایک بڑے حصے پر بھارتی فوج کے قبضے اور بے پناہ مظالم کے باوجود کشمیری عوام اپنے حقِ خودارادیت کے لیے بے خوف ہو کر جدوجہد کر رہے ہیں۔

انہوں نے کہا کہ نامور حریت رہنما اور جموں و کشمیر ڈیموکریٹک پارٹی کے سربراہ شبیراحمد شاہ، جموں و کشمیر لبریشن فرنٹ کے سربراہ محمد یاسین ملک اور انسانی حقوق کے معروف علمبردار خرم پرویز ان نظربندوں میں شامل ہیں جو اس وقت بھی بھارتی جیلوں کی زینت بنے ہوئے ہیں، خاص طور پر شبیراحمد شاہ شدید علیل ہیں اور ہم عالمی برادری خاص طور پر یورپی یونین اور اقوام متحدہ سے اپیل کرتے ہیں کہ شبیراحمد شاہ اور دیگر سیاسی قیدیوں کی رہائی کے لیے بھارت پر دبا ئوڈالیں۔