آرمی چیف فیلڈ مارشل سید عاصم منیر اور مسلح افواج کا حوالدار لالک جان شہید کو خراج عقیدت

پیر 7 جولائی 2025 23:01

راولپنڈی (اُردو پوائنٹ اخبارتازہ ترین - آن لائن۔ 07 جولائی2025ء) آرمی چیف فیلڈ مارشل سید عاصم منیر(نشان امتیاز ملٹری)، چیئرمین جوائنٹ چیفس آف اسٹاف کمیٹی، چیف آف نیول اسٹاف، چیف آف ایئر اسٹاف اور پاکستان کی مسلح افواج نے حوالدار لالک جان شہید نشانِ حیدر کو بھرپور خراج عقیدت پیش کرتے ہوئے کارگل جنگ کے دوران مادر وطن کے دفاع میں ان کی بے مثال ہمت، بے لوث قربانی اور عظیم خدمات کو یاد کیا۔

(جاری ہے)

پاک فوج کے شعبہ تعلقات عامہ (آئی ایس پی آر) کے مطابق آج کے دن 1999 میں حوالدار لالک جان شہید نے غیر معمولی بہادری کا مظاہرہ کرتے ہوئے دشمن کے حملوں کو بے خوفی سے پسپا کیا اور شدید زخمی ہونے کے باوجود اپنی پوسٹ کا دفاع کیا۔ انخلائ سے انکار کرتے ہوئے وہ اس وقت تک لڑتے رہے جب تک کہ فرض کی ادائیگی میں جام شہادت نوش نہیں کر لیا۔ افواج پاکستان اور قوم ان کی قربانی کو بے پناہ احترام اور تشکر کے ساتھ یاد کرتی ہے۔ ان کی میراث پاکستان کی مسلح افواج کی موجودہ اور آنے والی نسلوں کے لیے مشعل راہ ہے۔ ہم شہدائ کی مقدس امانت کو برقرار رکھنے اور مادر وطن کے دفاع کے لئے شہید ہونے والے شہدائ پاکستان کے مشن کو جرات، لگن اور حمیت کے ساتھ جاری رکھنے کے عزم کا اعادہ کرتے ہیں۔