وفاقی وزیرداخلہ کی حوالہ ہنڈی، جعلی ادویات اور بھکاری مافیا کے خلاف بلا امتیاز اور سخت کارروائی کی ہدایات

محسن نقوی نے بیرون ملک سے ڈی پورٹ ہوکر آنے والے بھکاریوں کی گرفتاری یقینی بنانے کا بھی حکم دے دیا

منگل 8 جولائی 2025 17:47

وفاقی وزیرداخلہ کی حوالہ ہنڈی، جعلی ادویات اور بھکاری مافیا کے خلاف ..

کراچی(اُردو پوائنٹ اخبارتازہ ترین - این این آئی۔ 08 جولائی2025ء)وفاقی وزیر داخلہ محسن نقوی نے حوالہ ہنڈی، جعلی ادویات اور بھکاری مافیا کے خلاف بلا امتیاز اور سخت کارروائی کی ہدایات جاری کرتے ہوئے ،بیرون ملک سے ڈی پورٹ ہوکر آنے والے بھکاریوں کی گرفتاری یقینی بنانے کا حکم دے دیا۔وفاقی وزیر داخلہ محسن نقوی نے ایف آئی اے کراچی زون کا دورہ کیا جہاں انہوں نے اجلاس کی صدارت بھی کی اور اس دوران انہوں نے حوالہ ہنڈی مافیا کے خلاف موثر کریک ڈائون کا حکم دیا۔

محسن نقوی نے کہا کہ کسی کا دبائو قبول کیے بغیر مافیا کے خلاف بلا امتیاز کارروائی کی جائے۔انہوں نے بھکاریوں کو بیرون ملک بھجوانے والے ایجنٹ مافیا کی سرکوبی کا حکم دیتے ہوئے کہا کہ بھکاری مافیا پاکستان کا امیج خراب کر رہا ہے، ایجنٹس پر بلا امتیاز ایکشن نظر آنا چاہیے، مفرور ایجنٹس کو دیگر صوبوں کے تعاون سے گرفتار کیا جائے، بیرون ملک سے ڈی پورٹ ہو کر آنے والے بھکاریوں کی گرفتاری یقینی بنائی جائے۔

(جاری ہے)

محسن نقوی نے مزید کہا کہ جعلی ادویات کا کاروبار کسی صورت برداشت نہیں، جعلی ادویات کے مکروہ دھندے میں ملوث لوگوں سے آہنی ہاتھوں سے نمٹا جائے، جعلی ادویات کے کاروبار میں ملوث لوگوں کی اصل جگہ جیل ہے۔وزیر داخلہ محسن نقوی نے نان کسٹم مصنوعات کے خلاف بھرپور کارروائی اور 5 ہزار سے زائد ڈالر بیرون ملک لے جانے والے مسافروں کیخلاف بھی سخت ایکشن لینے کا حکم دیا۔

محسن نقوی نے حکام کو ہدایت کی کہ ایسے مسافروں کے خلاف قانون کے مطابق بھرپور کارروائی کی جائے۔ڈائریکٹر کراچی زون نعمان صدیق نے دوران اجلاس وزیر داخلہ محسن نقوی کو بریفنگ دی، اور ایف آئی اے کراچی زون کی کارکردگی اور ایشوز سے آگاہ کیا۔ اجلاس میں ایڈیشنل ڈائریکٹر جنرل ایف آئی اے ساوتھ مجاہد اکبر خان، ڈائریکٹر ایف آئی اے کراچی زون نعمان صدیق، ڈپٹی ڈائریکٹر اینٹی منی لانڈرنگ، ڈپٹی ڈائریکٹر امیگریشن، ڈپٹی ڈائریکٹر اینٹی کرپشن، تمام اسسٹنٹ ڈائریکٹرز اور ایف آئی اے ساوتھ کے حکام نے شرکت کی۔