Live Updates

جن پی ٹی آئی ورکرز کو سزائیں ہوئیں ان کے گھر پر کھانے کو کچھ نہیں ہے .شیخ رشید

انصاف کو عام کیا جائے، چاہتے ہیں ملک میں امن و سکون ہو،بھارت کی آبی جارحیت کی وجہ سے پاکستان کا کسان تباہ و برباد ہوگیا، پاکستان کے کسانوں کی حقیقی معنوں میں مدد کی جائے . سابق وفاقی وزیرکی گفتگو

میاں محمد ندیم بدھ 3 ستمبر 2025 14:09

جن پی ٹی آئی ورکرز کو سزائیں ہوئیں ان کے گھر پر کھانے کو کچھ نہیں ہے ..

راولپنڈی (اردوپوائنٹ اخبارتازہ ترین-انٹرنیشنل پریس ایجنسی۔03 ستمبر ۔2025 )سربراہ عوامی مسلم لیگ اور سابق وفاقی وزیر شیخ رشید احمد نے کہا ہے کہ انصاف کو عام کیا جائے، ہم چاہتے ہیں ملک میں امن و سکون ہو اور پاکستان ترقی کرے،جن پی ٹی آئی ورکرز کو سزائیں ہوئیں ان کے گھر پر کھانے کو کچھ نہیں ہے انسداد دہشت گردی عدالت راولپنڈی کے باہر گفتگو کرتے ہوئے شیخ رشید کا کہنا تھا کہ جج صاحب کی آج طبیعت خراب ہے، ہماری حاضری لگ گئی، میرا بھتیجا کبھی فیصل آباد نہیں گیا، فیصل آباد میں میرے بھتیجے کو 4 کیسز میں 10،10 سال کی سزا دی گئی ہے، جرح کی بھی اجازت نہیں .

(جاری ہے)

انہوں نے کہا کہ اس کیس کا کوئی گواہ نہیں، ہمیں کیس لڑنے کی اجازت نہیں دی جارہی، وکیل اور گواہ سرکاری ہیں ان کا کہنا تھا کہ انصاف رسوا ہوگیا ہے، دھجیاں ادھڑ گئی ہیں، جن غریب ورکرز کو سزائیں دی گئی ہیں ان کے گھروں کے حالات دیکھیں، جن ورکرز کو سزائیں دی گئی ہیں ان کے گھروں میں کھانے کیلئے کچھ بھی نہیں، سکول کی فیس دینے کے پیسے نہیں ہیں .

سابق وفاقی وزیر نے کہا کہ انصاف کو عام کیا جائے، عوام کو سہولت دی جائے، اسی سے پاکستان آگے جائے گا، ہم چاہتے ہیں ملک میں امن و سکون ہو اور پاکستان ترقی کرے، ایسا انصاف نہ لائیں کہ لوگ آسمان کی طرف دیکھنا شروع کر دیں شیخ رشید کا کہنا تھا کہ کالا باغ اور دوسرے ڈیم بنانے کیلئے بہت کوششیں کی گئیں ہیں، 16 سے 17 بار وزیر رہا ہوں ہر بار ڈیم بنانے کی کوشش کی گئی، سندھ کے لوگ کالا باغ ڈیم کو قبول نہیں کرتے، بھارت کی آبی جارحیت کی وجہ سے پاکستان کا کسان تباہ و برباد ہوگیا، پاکستان کے کسانوں کی حقیقی معنوں میں مدد کی جائے سیلاب سے مہنگائی بڑھے گی، غریب پہلے مرا ہوا ہے، اس کو انصاف دیا جائے .