سندھ کے نوجوان کرکٹرز کیلئے لاہور قلندرز میں شمولیت کا سنہری موقع

گورنر سندھ افتتاح کرینگے، ٹرائلرز لاہور قلندرز، ایچ ای سی، پرائم منسٹر یوتھ پروگرام کے زیر اہتمام ہونگے

بدھ 9 جولائی 2025 23:12

اسلام آباد (اُردو پوائنٹ اخبارتازہ ترین - این این آئی۔ 09 جولائی2025ء)پرائم منسٹر یوتھ پروگرام اورہائیرایجوکیشن کمیشن کے زیر اہتمام سندھ کے نوجوانوں کو کرکٹ کے میدان میں قومی سطح پر جگہ بنانے کیلئے ٹرائلز کا آغاز (آج)جمعرات کوہوگا۔ ایچ ای سی کے ڈائریکٹر سپورٹس جاوید میمن کے مطابق پاکستان سپر لیگ کی چیمپین ٹیم لاہور قلندرز کے اشتراک سیسندھ کے مختلف شہروں میں لڑکوں اور لڑکیوں کے کرکٹ ٹرائلز کا آغازکراچی میں جامعہ این ای ڈی سے ہوگاجس کے بعد ٹرائلز حیدرآباد، لاڑکانہ، شہید بینظیرآباد، اور سکھر میں بھی منعقد ہوں گے۔

ان ٹرائلز کا مقصد سندھ بھر کے نوجوانوں کو اپنی صلاحیتوں کے اظہار کا موقع دینا ہے۔ ٹرائلز کی افتتاحی تقریب 10 جولائی کو کراچی کی این ای ڈی یونیورسٹی آف انجینئرنگ اینڈ ٹیکنالوجی میں منعقد ہوگی جس میں گورنر سندھ کامران خان ٹیسوری، صوبائی وزیر برائے کھیل و امور نوجوانان سردار محمد بخش خان مہر، چیئرمین وزیراعظم یوتھ پروگرام رانا مشہود احمد خان اور ڈائریکٹر اسپورٹس ایچ ای سی جاوید علی میمن خصوصی طور پر شرکت کریں گے۔

(جاری ہے)

چیئرمین وزیراعظم یوتھ پروگرام رانا مشہود احمد کا کے مطابق سندھ سے پہلے کرکٹ کے ٹرائلز بلوچستان کے شہر کوئٹہ میں منعقد کیے گئے جس میں نوجوانوں کی بڑی تعداد نے شرکت کی۔ ہم امید کرتے ہیں کہ سندھ کے نوجوان بھی اسی جوش و جذبے سے کرکٹ کے ٹرائلز میں حصہ لیں گے۔