امیرمقام کی زیر صدارت ضم اضلاع میں انصاف فراہمی، ترقی ودیگر امور بارے قائم کمیٹی کا اجلاس

جمعرات 10 جولائی 2025 23:06

اسلام آباد (اُردو پوائنٹ اخبارتازہ ترین - این این آئی۔ 10 جولائی2025ء)وزیراعظم شہباز شریف کی طرف سے ضم شدہ اضلاع میں انصاف فراہمی، ترقی و دیگر امور پر سفارشات مرتب کرنے کیلئے وفاقی وزیرامور کشمیر، گلگت بلتستان و سیفران انجینئر امیر مقام کی سربراہی میں قائم کردہ کمیٹی نے ضم شدہ اضلاع سے تعلق رکھنے والے سابق پارلیمنٹرینز کیساتھ 4 گھنٹے تفصیلی ملاقات کی۔

اجلاس میں سابق گورنر خیبرپختونخوا انجینئر شوکت اللہ اور سابق ایم این ایز الحاج شاہ جی گل آفریدی، شہاب الدین خان، سید غازی گلاب جمال، محمد نذیر خان، عبدالمالک وزیر، سید اخونزادہ چٹان، اور ناصر خان سمیت کئی اہم شخصیات نے شرکت کی۔سابق سینیٹرز ہلال الرحمان، عنایت وزیر، ملک خان مرجان، مومن خان، غالب خان وزیر اور عبدالرحمن خان بھی موجود تھے۔

(جاری ہے)

سابق سینیٹر و پاکستان مسلم لیگ ن کے مرکزی ایڈیشنل سیکرٹری اطلاعات زاہد خان نے اجلاس میں خصوصی شرکت کی۔اجلاس میں ضم شدہ اضلاع میں فوری اور سستے انصاف کی فراہمی، روایتی جرگہ سسٹم کو مؤثر بنانے، امن و امان کے قیام اور ترقیاتی عمل کو بہتر بنانے سے متعلق جامع تجاویز پیش کی گئیں۔چیئرمین کمیٹی نے واضح کیا کہ بعض عناصر کی جانب سے انضمام کے خاتمے یا ایف سی آر کی واپسی سے متعلق پھیلایا گیا پروپیگنڈا بے بنیاد، من گھڑت اور گمراہ کن ہے۔

انہوں نے کہا کہ سفارشات آئین و قانون کے دائرہ کار میں رہتے ہوئے، خیبرپختونخوا حکومت اور ضم شدہ اضلاع کے عوام کو مکمل اعتماد میں لے کر مرتب کی جائیں گی تاکہ عوام کے مسائل کو سنجیدگی سے حل کیا جا سکے۔ انہوں نے خیبرپختونخوا کے قبائلی اضلاع کی وکالت کرنے پر وفاقی وزیر انجینئر امیر مقام کا شکریہ ادا کیا۔