وزیراعظم کا کشمیریوں کی سیاسی، سفارتی اور اخلاقی حمایت جاری رکھنے کا عزم

جولائی کا دن کشمیری مسلمانوں کی موروثی استقامت، سفاک قوتوں کیخلاف مزاحمت اور غیر متزلزل عزم کی یاد دہانی ہے، شہباز شریف کا یوم شہدا کشمیر پر بیان

ہفتہ 12 جولائی 2025 21:50

اسلام آباد (اُردو پوائنٹ اخبارتازہ ترین - این این آئی۔ 12 جولائی2025ء)وزیراعظم شہباز شریف نے کشمیریوں کی سیاسی، سفارتی اور اخلاقی حمایت جاری رکھنے کا عزم کرتے ہوئے کہا ہے کہ 13 جولائی کا دن کشمیری مسلمانوں کی موروثی استقامت، سفاک قوتوں کیخلاف مزاحمت اور غیر متزلزل عزم کی یاد دہانی ہے۔ یوم شہدا کشمیر کے موقع پر جاری پیغام میں وزیراعظم نے کہا کہ یوم شہدا کشمیر ہر سال 13جولائی 1931ء کے ان 22کشمیریوں کو خراج عقیدت پیش کرنے کیلئے منایا جاتا ہے جنہوں نے جموں و کشمیر کی ڈوگرہ فورسز کے خلاف احتجاج کرتے ہوئے اپنی جانوں کا نذرانہ پیش کیا۔

انہوں نے کہا کہ یہ دن کشمیر کے مسلمانوں کی موروثی استقامت، سفاک قوتوں کے خلاف مزاحمت اور غیر متزلزل عزم کی یاد دہانی کے طور پر کام کرتا ہے۔

(جاری ہے)

انہوں نے کہا کہ آزادی، انسانی حقوق اور حقوق کشمیر کے لئے جانوں کا نذرانہ پیش کرنے کی جدوجہد کشمیر کی پوری تاریخ میں برقرار رہی ہے۔ انہوں نے کہا کہ کشمیری عوام حق خودارادیت کے حصول کے لیے اپنی جائز جدوجہد کے لئے جانوں کے نذرانے پیش کرتے رہے ہیں اور کررہے ہیں۔

وزیراعظم نے کہا کہ حکومت پاکستان،ہندوستان کے غیر قانونی زیر تسلط جموں و کشمیر کے مسلمانوں کے ساتھ اظہار یکجہتی کرتے ہوئے اپنی سیاسی، سفارتی اور اخلاقی حمایت کا اظہار کرتی ہے۔ انہوں نے کہا کہ ہم ان تمام کشمیری شہدا کی بہادری اور عزم کو سلام پیش کرتے ہیں، جنہوں نے کئی دہائیوں پر محیط ہندوستانی قبضے کے دوران اپنی جانوں کا نذرانہ پیش کیا۔وزیراعظم نے کہا کہ آج کے دن حکومت پاکستان ، اقوام متحدہ کی قراردادوں کے تحت کشمیر کے مسئلے کا حل اور جموں کشمیر کے حق خودارادیت کے عزم کا اعادہ کرتا ہے۔