عراق اور ایران جانے والے زائرین بہت اہم ہیں،سہ ملکی کانفرنس سے زائرین کو مزید سہولت ملے گی، وزیر داخلہ

اسلام آباد (اُردو پوائنٹ اخبارتازہ ترین - این این آئی۔ 14 جولائی2025ء)وفاقی وزیر داخلہ محسن نقوی نے واضح کیا ہے کہ عراق اور ایران جانے والے زائرین بہت اہم ہیں،سہ ملکی کانفرنس سے زائرین کو مزید سہولت ملے گی، وزیراعظم پاکستان اور دیگر اعلیٰ حکام نے جنگ میں ایران کیلئے انتہائی متحرک و مثبت کردار ادا کیا،جنگ کے دوران پاکستانی عوام ایرانی عوام کے ساتھ کھڑے رہے، پاکستان اور ایران بھائی ہیں اور ہمیشہ بھائی رہیں گے۔

ان خیالات کا اظہار انہوں نے پاکستان کی درخواست پر زائرین کے مسائل کے حل کیلئے بلائی گئی سہ ملکی کانفرنس سے خطاب کرتے ہوئے کیا۔ وزیر داخلہ نے کہا کہ جنگ میں شاندار فتح پر ایران اور ایرانی وزیر داخلہ کو مبارکباد دیتا ہوں۔ وزیر داخلہ نے کہا کہ پاکستان نے ایران پر حملے کی کھل کر مذمت کی اور ایران کے حق دفاع کو مکمل طور پر سپورٹ کیا۔

(جاری ہے)

محسن نقوی نے کہا کہ جنگ کے دوران پاکستانی عوام ایرانی عوام کے ساتھ کھڑے رہے، پاکستان اور ایران بھائی ہیں اور ہمیشہ بھائی رہیں گے۔ وفاقی وزیر داخلہ نے کہا کہ وزیراعظم پاکستان اور دیگر اعلیٰ حکام نے جنگ میں انتہائی متحرک و مثبت کردار ادا کیا ۔انہوں نے کہ پاکستان نے وہ بہترین کردار ایران کے لئے ادا کیا۔ انہوں نے کہا کہ پاکستان میں ایران کے سفیر امیری مقدم یہاں موجود ہیں اور یہ اس بات کے گواہ ہیں۔

محسن نقوی نے کہا کہ سب جانتے ہیں کہ اربعین پر لاکھوں زائرین عراق جاتے ہیں، عراقی وزیر داخلہ اور وزارت داخلہ جس طرح لاکھوں زائرین کی دیکھ بھال کرتے ہیں وہ قابل تحسین ہے۔ محسن نقوی نے کہا کہ زائرین کو بہترین طریقے سے ہینڈل کرنے پر عراقی وزارت داخلہ کو سلام پیش کرتے ہیں۔ وزیر داخلہ نے کہا کہ زائرین کے حوالے سے عراق و ایران کے وزرائے داخلہ کو پاکستان کی جانب سے ہر ممکن یقین دہانی کراتے ہیں۔

محسن نقوی نے کہا کہ یکم جنوری 2026 کے بعد پاکستانی زائرین انفرادی طور پر عراق نہیں جا سکیں گے، زائرین گروپ آرگنائزرز کے تحت ہی عراق جاسکیں گے۔ محسن نقوی نے کہا کہ زائرین گروپ آرگنائزرز کی رجسٹریشن کا عمل شروع کر دیا گیا ہے، آرگنائزرز گروپ عراق جانے والے زائرین کی وطن واپسی کے ذمہ دار ہوں گے۔ محسن نقوی نے کہا کہ صرف وہی لوگ انفرادی طور پر عراق جاسکیں گے جنہیں سفارتخانہ خصوصی ویزا جاری کرے گا، گروپ آرگنائزرز کے سسٹم سے غیر قانونی عراق جانے والوں اور زائد قیام کے رجحان کا خاتمہ ہو گا۔

وفاقی وزیر داخلہ نے کہا کہ عراق اور ایران بھی پاکستان کے اس نئے نظام کے ساتھ ہیں، ہم نے مشترکہ اقدامات سے مل کر غیر قانونی طور پر عراق جانے والوں اور وہاں زائد قیام کرنے والوں کو ہر صورت روکنا ہے۔ محسن نقوی نے کہا کہ پاکستان کے زائرین کی دیکھ بھال پرعراق اور ایران کی حکومتوں کا شکریہ ادا کرتا ہوں۔ محسن نقوی نے کہا کہ لاکھوں زائرین کا خیال رکھنا بہت بڑا چیلنج ہے اور دونوں وزرائے داخلہ یہ ذمہ داری خوش اسلوبی سے ادا کر رہے ہیں۔

انہوں نے کہا کہ ایران کے سپریم لیڈر آیت اللہ خامنہ ای جنگ کے دوران مضبوطی سے کھڑے رہے اور جر?ت کے ساتھ قیادت کی ، آیت اللہ خامنہ ای اور ایرانی عوام کو عظیم فتح پر مبارکباد دیتے ہیں۔ وفاقی وزیر داخلہ نے کہا کہ ایران کے نائب وزیر داخلہ علی اکبر پور جمشیدیان، ایرانی وزیر داخلہ کے سینئر مشیر نادر یار احمدی، پاکستان میں ایران کے سفیر امیری مقدم، ایران میں پاکستان کے سفیر محمد مدثر ٹیپو، پاکستانی وزارت داخلہ کے سیکرٹری خرم آغا، عراق کی وزارت داخلہ کے اعلی حکام نے بھی سہ ملکی کانفرنس میں شرکت کی۔

ایران کے دارالحکومت تہران میں پاکستان۔ ایران اور عراق کے وزرائے داخلہ کی سہ ملکی کانفرنس میں ایران اور عراق جانے والے زائرین کی سہولت کیلئے ہر ممکن اقدام پر اتفاق کیا۔ کانفرنس میں فیصلہ کیا گیا کہ زائرین کی سہولت کیلئے پاکستان۔ ایران اور عراق کا مشترکہ ورکنگ گروپ تشکیل دیا جائے گا۔