نیب نے رکن کے پی اسمبلی ڈاکٹر امجد کیخلاف آمدن سے زائد اثاثوں کی انکوائری شروع کردی

پیر 14 جولائی 2025 22:10

اسلام آباد(اُردو پوائنٹ اخبارتازہ ترین - این این آئی۔ 14 جولائی2025ء)نیب نے خیبرپختونخوا اسمبلی کے سوات سے رکن ڈاکٹر امجد علی کے خلاف آمدن سے زائد اثاثوں کی انکوائری شروع کردی۔نیب کے مطابق ڈاکٹر امجد علی پر بدعنوانی، مشکوک آمدنی اور کرپٹ پریکٹسز کا الزام ہے اور وہ وزیراعلیٰ کے معاون خصوصی برائے ہاؤسنگ رہ چکے ہیں۔

(جاری ہے)

نیب نے ڈاکٹر امجد علی کو اثاثہ جات فام، سوالنامے اور 2013سے انکم ٹیکس کا ریکارڈ 17جولائی تک پشاور دفتر میں پیش کرنے کا حکم دیا۔نیب کی جانب سے جاری نوٹس میں بتایا گیاکہ حقائق چھپانے یا غلط بیانی پر قانونی کارروائی کی جائے گی۔خیال رہے کہ پاکستان تحریک انصاف کے حمایت یافتہ آزاد رکن ڈاکٹر امجد علی خیبرپختونخوا اسمبلی کے حلقہ پی کے 7 سے منتخب ہوئے۔