Live Updates

بھٹو زرداری کا لاہورسمیت پنجاب میں بارش کے دوران جانی و مالی نقصان پر اظہار افسوس

بدھ 16 جولائی 2025 17:36

اسلام آباد (اُردو پوائنٹ اخبارتازہ ترین - این این آئی۔ 16 جولائی2025ء)پاکستان پیپلز پارٹی کے چیئرمین بلاول بھٹو زرداری نے لاہور سمیت پنجاب میں بارش کے دوران جانی و مالی نقصان پر اظہار افسوس کرتے ہوئے کہا ہے کہ لاہور اور رائیونڈ سمیت مختلف علاقوں میں بارش کے دوران 27 قیمتی جانوں کا ضیاع باعثِ صدمہ ہے۔ اپنے بیان میں بلاول بھٹو زر داری نے کہاکہ مرید وال میں گھر کی چھت گرنے سے ایک ہی خاندان کے 5 افراد کے جاں بحق ہونے کی خبر سن کر دلی دکھ ہوا۔

انہوںنے کہاکہ پنجاب میں حادثات میں اپنے پیاروں کو کھونے والے خاندانوں کے غم میں برابر کا شریک ہوں۔ انہوںنے کہاکہ پنجاب بھر میں بارش کے دوران حادثات میں زخمی ہونے والے شہریوں کے بہتر علاج معالجہ کو یقینی بنایا جائے۔

(جاری ہے)

بلاول بھٹو زرداری نے کہاکہ لاہور اور روالپنڈی سمیت ڈسکہ، حافظ آباد، وزیرآباد اور گوجرانوالہ کے نشیبی علاقوں سے بارش کا پانی نکالنے کے لیے فوری اقدامات کی ضرورت ہے۔

بلاول بھٹو زر داری نے کہاکہ فیصل آباد، ننکانہ صاحب، منچن آباد، بہاولنگر، پاکپتن، عارف والا، قصور اور فاروق آباد کے بھی بہت سارے علاقوں میں بارش کا پانی کھڑا ہے۔ بلاول بھٹوزر داری نے کہاکہ بارش میں جن شہریوں کے گھروں کو نقصان پہنچا ہے، اٴْنہیں فوری حکومتی امداد کی ضرورت ہے۔ انہوںنے کہاکہ بارش کی وجہ سے پنجاب کے دیہی علاقے بھی متاثر ہوئے ہیں خصوصاً زرعی شعبے کو ہونے والے نقصان کا تدارک کیا جائے۔ انہوںنے کہاکہ لاہور سمیت پنجاب بھر کے بارش متاثرین کو پیپلز پارٹی اکیلا نہیں چھوڑے گی، بارش متاثرین کو ان کا حق دلوائیں گے۔