Live Updates

پی آئی اے پروازوں کی بحالی، تارکین وطن میں خوشی کی لہر دوڑ گئی

جمعرات 17 جولائی 2025 14:47

اسلام آباد(اُردو پوائنٹ اخبارتازہ ترین - این این آئی۔ 17 جولائی2025ء)برطانیہ کیلئے پاکستان کی قومی ائیر لائن پی آئی اے کی پروازوں کی بحالی پر تارکین وطن میں خوشی کی لہر دوڑ گئی۔رپورٹ کے مطابق برطانوی حکومت کی طرف سے عائد کردہ پابندیاں طویل عرصہ بعد ختم کی گئی ہیں۔سابق وزیراعظم عمران خان کے دور حکومت میں کراچی طیارہ حادثہ کے بعد 2020 میں پی آئی اے پر وزیر ہوابازی چوہدری غلام سرور کی طرف سے ایک تہائی کمرشل پائلٹس کی بوگس ڈگریوں کے انکشاف بعد برطانیہ اور یورپی ممالک کی طرف سے پی آئی اے پر پابندیاں عائد کر دی گئی تھیں۔

(جاری ہے)

کئی سال تک تارکین وطن دیگر ایئر لائنز کے ہاتھوں بلیک میل ہو کر بھاری بھرکم اور منہ مانگی فیس ادا کرنے پر مجبور رہے‘ حکومت پاکستان پابندیوں کے خاتمے کیلئے طویل عرصہ سے کوشاں تھیں ‘ گزشتہ برس نومبر میں یورپی یونین کی طرف سے پروازوں پر عائد پابندی اٹھالی گئی تھی اب برطانیہ نے بھی فلائٹس کی اجازت دیدی ہے۔برطانوی ہائی کمیشن نے کہا کہ14اگست سے سروس دوبارہ بحال ہونگی،پاکستانی ایئر لائنز اب برطانیہ کیلئے پروازوں کی درخواست دے سکتی ہے ،تاہم ایئر لائنز کو پروازوں کیلئے یو کے سی اے اے سے اجازت لینا ہوگی۔