پٹرولیم قیمتوں میں اضا فہ، ریلوے، پبلک اور گڈز ٹرانسپورٹ کے کرایوں میں بھاری اضافہ کردیا گیا

لاہور(اردوپوائنٹ اخبارتازہ ترین-انٹرنیشنل پریس ایجنسی۔17 جولائی ۔2025 )پیٹرولیم مصنوعات کی قیمتوں میں حالیہ اضافے کا بوجھ ایک بار پھر عوام پر ڈال دیا گیا پاکستان ریلوے کے ساتھ ساتھ پبلک ٹرانسپورٹرز اور گڈز ٹرانسپورٹ نے کرایوں میں نمایاں اضافہ کر دیا ہے پاکستان ریلوے نے ایک مرتبہ پھر مسافر اور گڈز ٹرینوں کے کرایوں میں 2 فیصد اضافہ کر دیا ہے جبکہ کول ٹرانسپورٹیشن کے کرایوں میں 3 فیصد اضافہ کیا گیا ہے اور اس کا نوٹیفیکیشن جاری کر دیا گیاہے.

(جاری ہے)

نئے کرایوں کا اطلاق مسافر ٹرینوں کے لیے 18 جولائی اور گڈز ٹرینوں کے لیے 21 جولائی سے ہوگاریلوے حکام کے مطابق یہ دوسری بار ہے کہ دو ہفتوں کے اندر کرایوں میں اضافہ کیا گیا ہو اس سے قبل 4 جولائی کو بھی 2 فیصد اضافہ کیا گیا تھا ادھر پبلک ٹرانسپورٹرز نے بھی عوام پر اضافی بوجھ ڈال دیا ہے اور کرایوں میں 250 روپے تک کا اضافہ کر دیا ہے لاہور سے راولپنڈی کا کرایہ 2180 روپے سے بڑھا کر 2270 روپے کر دیا گیا لاہور سے پشاور کا کرایہ 2600 سے بڑھ کر 2850 روپے ہو گیا لاہور سے فیصل آباد کا کرایہ 1110 سے بڑھ کر 1150 روپے کر دیا گیا اسی طرح گڈز ٹرانسپورٹ کے کرایوں میں بھی ہوشربا 20 فیصد اضافہ کیا گیا ہے لاہور سے کراچی کا کرایہ 20 ہزار روپے اضافے کے بعد ایک لاکھ 20 ہزار روپے ہو گیا لاہور سے پشاور کا کرایہ 16 ہزار روپے بڑھ کر 96 ہزار روپے ہو گیا جبکہ لاہور سے راولپنڈی کا کرایہ 12 ہزار روپے اضافے کے بعد 72 ہزار روپے مقرر کیا گیا.

دریں اثناءگڈز ٹرانسپورٹرز کے صدر طارق نبیل کا کہنا ہے کہ ایک ماہ میں ڈیزل کی قیمت میں تین بار اضافہ ہو چکا ہے جس سے کرایوں میں اضافہ ناگزیر ہو گیا ہے ان کا کہنا ہے کہ ڈیزل کی قیمت میں تقریبا 30 روپے کا اضافہ ہوا ہے، جبکہ ٹول ٹیکسز اور دیگر سرکاری محصولات میں بھی اضافے نے ٹرانسپورٹرز کو دبا میں ڈال دیا ہے . طارق نبیل نے حکومت سے مطالبہ کیا ہے کہ پیٹرولیم مصنوعات کی قیمتوں میں فوری کمی کی جائے، ورنہ عوام کو اس کا خمیازہ اشیا ضروریہ کی قیمتوں میں اضافے کی صورت میں بھگتنا پڑے گا مہنگے ایندھن، بڑھتے کرایے اور ٹیکسوں کے طوفان میں گھرے عوام ایک بار پھر مہنگائی کی چکی میں پسنے لگے ہیں، جب کہ حکومت کی جانب سے کوئی ریلیف نہ ملنے پر تشویش بڑھتی جا رہی ہے.