ادارے کرپٹ عناصر کو عوام پر مسلط کرنے کے رویوں پر نظرثانی کریں‘ حافظ نعیم الرحمن

لاہور(اُردو پوائنٹ اخبارتازہ ترین - این این آئی۔ 17 جولائی2025ء) امیر جماعت اسلامی حافظ نعیم الرحمن نے کہا ہے کہ ادارے کرپٹ عناصر کو عوام پر مسلط کرنے کے رویوں پر نظرثانی کریں، فارم47 کی بنیاد پر آئے ہوئے حکمران بہتری نہیں لاسکتے،حکومتی و اپوزیشن پارٹیوں میں ٹرمپ کی چاپلوسی کا مقابلہ جاری ہے، غزہ میں صہیونی جارحیت کی پشت پناہی کرنے والے کو نوبل انعام کے لیے نامزد کردیا گیا۔

منصورہ کی مرکزی تربیت گاہ میں شریک اندرون سندھ سے آئے ہوئے افراد کی بڑی تعداد سے خطاب کرتے ہوئے امیر جماعت اسلامی نے کہا کہ پیپلز پارٹی عوامی نہیں اسٹیبلشمنٹ کی حمایت سے سندھ پر قابض ہے۔ کراچی میں پی پی اور ایم کیو ایم کو ہاری ہوئی تمام سیٹیں دے دی گئیں، اداروں کی مدد نہ ہوتی تو کراچی میں پی پی کا میئر کیسے بن سکتا تھا انہوں نے کہا کہ سندھ پر دہائیوں سے قابض پی پی حکومت نے وادی مہران کے عوام کو تمام بنیادی سہولیات سے محروم کررکھا ہے۔

(جاری ہے)

صوبے کا تعلیم کا بجٹ ساڑھے چار سو ارب ہونے کے باوجود بھی تعلیم کا بیڑہ غرق ہے، ایک کروڑ بچے تعلیم سے محروم، سکولوں میں جعلی بھرتیاں ہیں۔ انہوں نے کہا سندھ میں ڈاکوؤں کو سرداروں کی سرپرستی حاصل ہے۔ سرداری نظام ظالمانہ نظام ہے، صوبہ کے عوام اس کے خلاف اٹھ کھڑے ہوں، سماجی برائیوں اور منشیات کے خاتمے کے لیے عوامی کمیٹیاں بنائی جائیں، جماعت اسلامی حق کی آواز بلند کرنے والے ہر فرد کا ساتھ دے گی۔

امیر جماعت نے واضح کیا کہ وراثت کی بنیاد اور وصیت کی پرچی پر چلنے والی سیاسی پارٹیوں اور ایک ایک فرقہ کی نمائندگی کرنے والی مذہبی جماعتوں کے برعکس جماعت اسلامی نسلی و صوبائی تعصبات اور فرقہ واریت سے پاک اقامت دین کی تحریک ہے، ہمارے ہاں سیاست عبادت تصور کی جاتی ہے، ہم عوام کو امن، ترقی، خوشحالی کے حصول اور اسلامی نظام کے قیام پر متحد کررہے ہیں۔

جماعت اسلامی میں سیاست خاندان، ذات کے مفادات کے لیے نہیں ہوتی۔ انہوں نے سوال اٹھایا کہ کیا ایم این ایز اور ایم پی ایز کی خریدوفروخت میں ملوث سیاستدانوں کو بڑا سیاست دان سمجھا جانا چاہیی امیر جماعت اسلامی کا کہنا تھا کہ خاندانوں پر مشتمل سیاسی پارٹیاں موجودہ دور میں عوام اور خصوصی طور نوجوانوں کو بے وقوف نہیں بنا سکتیں۔ نوجوانوں میں جماعت اسلامی کی مقبولیت میں اضافہ ہورہا ہے۔

جماعت اسلامی سمجھتی ہے کہ چہرے بدلنے سے نہیں، نظام بدلنے سے مسائل حل ہوں گے۔ غزہ کی صورتحال پر گفتگو کرتے ہوئے حافظ نعیم الرحمن نے کہا کہ امریکہ اسرائیل کو مسلسل ہتھیار فراہم کررہا ہے، صہیونی ریاست بدمست ہاتھی بن چکی ہے، اس نے شام پر بھی حملہ کردیا ہے۔ انہوں نے کہا کہ اسلامی دنیا کے حکمران عوام کے حقیقی نمائندے ہوتے تو اسرائیل کو غزہ کے عوام پر مظالم ڈھانے کی جرأت نہ ہوتی۔ انہوں نے کہا کہ امت کو اپنے اپنے ممالک میں حقیقی قیادت لانا ہوگی۔