شراب اور اسلحہ برآمدگی کیس علی امین گنڈاپور کے وکیل نے پشاور ہائیکورٹ کا فیصلہ سیشن کورٹ میں پیش کر دیا

اسلام آباد کے جوڈیشل مجسٹریٹ مبشر حسن چشتی کی کیس پر سماعت‘ وکیل کے دلائل کے بعد عدالت نے سماعت ملتوی کردی

میاں محمد ندیم ہفتہ 19 جولائی 2025 14:08

شراب اور اسلحہ برآمدگی کیس علی امین گنڈاپور کے وکیل نے پشاور ہائیکورٹ ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔19 جولائی ۔2025 )شراب اور اسلحہ برآمدگی کیس میں وزیراعلیٰ خیبرپختونخوا علی امین گنڈاپور کے وکیل نے پشاور ہائیکورٹ کا فیصلہ سیشن کورٹ میں پیش کر دیا ہے اور موقف اختیار کیا کہ یہ عدالت علی امین گنڈا پور کے وارنٹ گرفتاری جاری نہیں کر سکتی. نجی ٹی وی کے مطابق اسلام آباد کی ڈسٹرکٹ اینڈ سیشن کورٹس میں جوڈیشل مجسٹریٹ مبشر حسن چشتی نے کیس پر سماعت کی، علی امین گنڈا پور کے وکیل نے دلائل دیے کہ علی امین گنڈاپور 23 ستمبر تک ہر طرح کے کیسز پر ضمانت پر ہیں.

(جاری ہے)

وکیل نے کہا کہ گزارش ہے کہ ستمبر کی کوئی تاریخ دے دیں فاضل جج نے کہا کہ آپ آرڈر کا انتظار کریں، عدالت نے کیس کی سماعت ملتوی کر دی، علی امین گنڈا کے خلاف تھانہ بارہ کہو میں مقدمہ درج ہے واضح رہے کہ اکتوبر 2016 میں اسلام آباد پولیس نے دعویٰ کیا تھا کہ انہوں نے بنی گالا کے باہر پاکستان تحریک انصاف کے رہنما کی گاڑی سے 5 کلاشنکوف اسالٹ رائفلز، ایک پستول، 6 میگزین، ایک بلٹ پروف جیکٹ، شراب اور آنسو گیس کے تین گولے برآمد کیے.

پی ٹی آئی رہنما نے پولیس کے ان دعووں کو مسترد کرتے ہوئے کہا تھا کہ وہ دو لائسنس یافتہ کلاشنکوف رائفلوں کے ساتھ سفر کر رہے تھے اور گاڑی میں اسلحہ کا لائسنس موجود تھاانہوں نے یہ بھی دعویٰ کیا تھا کہ وہ شراب کی بوتل میں شہد لے کر جا رہے تھے جسے پولیس اہلکاروں نے ضبط کر لیا.